संचालनमा रहेका २० वटै वाणिज्य बैंकले आर्थिक वर्ष २०८२/८३ को अपरिस्कृत वित्तीय विवरण प्रकाशन गरेका छन् । प्रकाशित वित्तीय विवरण अनुसार यस अवधिमा वाणिज्य बैंकहरुको नाफा समग्रमा ३२.२८ प्रतिशतले बढेको छ।
समीक्षा अवधिमा वाणिज्य बैंकहरुले कुल ६९ अर्ब ८६ करोड खुद नाफा कमाएका छन् । अघिल्लो आर्थिक वर्षको यसै अवधिमा वाणिज्य बैंकहरुको खुद नाफा ५२ अर्ब ८१ करोड रहेको थियो।
समीक्षा अवधिमा प्रतिशतको आधारमा हिमालयन बैंकको खुद नाफा सर्वाधिक १०४१ प्रतिशतले बढेको छ भने कुमारी बैंकको खुद नाफा ३०५.९६ प्रतिशतले बढेको छ। त्यस्तै अघिल्लो आर्थिक वर्षमा घाटामा रहेको एनआईसी एशिया बैंकले आर्थिक वर्ष २०८२/८३ मा नाफामा फर्किएको छ।
समीक्षा अवधिमा ४ वटा वाणिज्य बैंकको नाफा घटेको छ। जस मध्ये नेपाल इन्भेष्टमेन्ट मेगा बैंकको नाफा सर्वाधिक ३६.५९ प्रतिशतले घटेको छ भने कृषि विकास बैंकको नाफा २९.५२ प्रतिशतले घटेको छ। लक्ष्मी सनराइज बैंक र स्ट्याण्डर्ड चाटर्ड बैंकको खुद नाफा पनि घटेको छ।
यस अवधिमा प्रभु बैंक भने घाटामा रहेको छ। अघिल्लो आर्थिक वर्षमा नाफामा रहेको प्रभु बैंक आर्थिक वर्ष २०८२/८३ मा भने २४ करोड १२ लाख ४३ हजार घाटामा रहेको छ। प्रभु बैंकको निष्क्रिय कर्जा बढेर १५.५५ प्रतिशत पुगेको छ। अन्य सबै बैंकको निष्क्रिय कर्जा १० प्रतिशतभन्दा कम नै छ।
यस अवधिमा ४ वटा वाणिज्य बैंकको वितरणयोग्य मुनाफा ऋणात्मक रहेको छ। वितरणयोग्य ऋणात्मक हुने बैंकमा हिमालयन बैंक, एनआईसी एशिया बैंक, नेपाल इन्भेष्टमेन्ट मेगा बैंक र प्रभु बैंक रहेका छन् । यी ४ बैंकले लाभांश दिन नसक्ने निश्चित छ।
हेर्नुस् आर्थिक वर्ष २०८२/८३ मा वाणिज्य बैंकको नाफा, वितरणयोग्य मुनाफा, प्रति शेयर आम्दानी र निस्क्रिय कर्जाको विवरण :
