नेपाल एसबिआई बैंकले गत आर्थिक वर्ष २०८१/८२ को चौथो त्रैमासको वित्तीय विवरण प्रकाशन गरेको छ। प्रकाशित विवरण अनुसार आर्थिक वर्ष २०८१/८२ मा कम्पनीले १ अर्ब ८० करोड २५ लाख रुपैयाँ खुद नाफा कमाएको छ।
अघिल्लो आर्थिक वर्षको सोहि अवधिको तुलनामा कम्पनीको खुद नाफा ९.८६ प्रतिशतले घटेको हो । अघिल्लो आर्थिक वर्षको यसै अवधिमा कम्पनीको खुद नाफा १ अर्ब ९९ करोड थियो।
समीक्षा अवधिमा कम्पनीको खुद ब्याज आम्दानी ३.७२ प्रतिशतले बढेर ५ अर्ब २६ करोड कायम भएको छ। यस अवधिमा कम्पनीले सम्भावित जोखिमको लागि छुट्याएको इम्पेयरमेन्ट चार्ज अन्तर्गतको रकम ६४ करोड ८३ लाखबाट बढेर १ अर्ब २ करोड पुगेको छ । इम्पेयरमेन्ट चार्ज बट्दा खुद ब्याज आम्दानी बढे पनि बैंकको नाफा घटेको देखिन्छ। कम्पनीको संचालन नाफा ३.६२ प्रतिशतले घटेर २ अर्ब ७३ करोड कायम भएको छ ।
यस अवधिमा कम्पनीको वितरणयोय मुनाफा १ अर्ब २३ करोड पुगेको छ । कम्पनीको वितरणयोग्य प्रति शेयर आम्दानी ११.२९ रुपैयाँ रहेको छ, यसले कम्पनीको लाभांश क्षमता ११.२९ प्रतिशत रहेको देखाउछ । यद्यपि बैंकले दिने लाभांश भने विभिन्न नियमकीय व्यवस्था र निर्दशनमा भर पर्छ।
कम्पनीको चुक्ता पुंजी १० अर्ब ८९ करोड रुपैयाँ रहेको छ भने रिजर्भमा ८ अर्ब ४२ करोड रहेको छ। कम्पनीले यस अवधिसम्ममा १ खर्ब ९९ अर्ब निक्षेप संकलन गरेको छ भने १ खर्ब ३४ अर्ब कर्जा लगानी गरेको छ।
समीक्षा अवधिमा कम्पनीको प्रति शेयर आम्दानी १६.५४ रुपैयाँ रहेको छ भने कम्पनीको प्रति शेयर नेटवर्थ १८८.५९ रुपैयाँ रहेको छ। कम्पनीको खराब कर्जा ३.३५ प्रतिशत रहेको छ।
