ग्लोबल इक्विटी फन्ड द्वारा व्यवस्थित स्थायी पूँजी कोष, नेपाल इन्फ्रास्ट्रक्चर्स इन्भेष्टमेन्ट फण्ड लिमिटेडले नेपालमा सौर्य ऊर्जा समाधानको अग्रणी प्रदायक कम्पनी घाम पावर नेपालको सहायक कम्पनी घाम ऊर्जा सेवामा रणनीतिक लगानी गरेको छ । यो लगानीले नेपालको नवीकरणीय ऊर्जा क्षेत्रलाई अगाडि बढाउने र दिगो पूर्वाधार विकासलाई प्रवर्द्धन गर्ने ग्लोबल इक्विटी फन्डको प्रतिबद्धतालाई जोड दिएको फण्डले उल्लेख गरेको छ।
घाम पावर नेपालको सहायक कम्पनी घाम ऊर्जा सेवाले ५ देखि २० वर्षको विद्युत खरिद सम्झौता (PPA) मोडेलमा व्यावसायिक र औद्योगिक संस्थाहरूलाई छतको सौर्य समाधान प्रदान गर्दछ । कम्पनीले सोल्टी होटल, सारस बेभरेजेस, गोर्खा ब्रुअरी, अरिहन्त इन्फ्रास्ट्रक्चर्सको जस्ता दर्जनौ प्रतिष्ठित संस्थाहरूका लागि छाना माथि अफ ग्रिड सौर्य परियोजनाहरू सफलतापूर्वक स्थापना गरेको छ।
आर्थिक वर्ष २०८०-८१ सम्म कम्पनीको कुल स्थापित क्षमता ५.७ मेगावाट थियो, जुन आर्थिक वर्ष २०८१-८२ को दोस्रो त्रैमासिकमा ७.७६ मेगावाटमा विस्तार भएको छ । घाम ऊर्जा सेवाले पूँजीगत खर्चमा लगानी गरेर आफ्नो बजार उपस्थितिलाई अझ बलियो बनाउने लक्ष्य राखेको छ जसले गर्दा थप १०.२७ मेगावाटले आफ्नो क्षमता विस्तार हुनेछ । यो महत्वाकांक्षी वृद्धि प्रक्षेपणले घाम ऊर्जा सेवालाई नेपालको नवीकरणीय ऊर्जा बजारमा एक प्रमुख खेलाडीको रूपमा स्थापित गर्ने बताईएको छ। कम्पनीको जोखिम न्यूनीकरण रणनीतिहरूले बजारको उतारचढाव र नियामक परिवर्तनहरू विरुद्ध लचिलोपन प्रदान गर्दछ र स्वच्छ ऊर्जा समाधानहरूको बढ्दो मागसँग तालमेललाई बढावा दिने फण्डले उल्लेख गरेको छ।
फण्डले भनेको छ ‘ग्लोबल इक्विटी फन्ड र घाम ऊर्जा सेवा बीचको रणनीतिक साझेदारीले नेपाल स्वच्छ उर्जा तर्फ अग्रसर भएको छ र बृहत् आर्थिक वृद्धि र वातावरणीय दिगोपनलाई समर्थन गर्दछ। दिगो विकास उद्देश्यहरूसँग वित्तीय व्यवहार्यतालाई सन्तुलनमा राखेर यो सहकार्यले नेपालमा हरियाली र थप लचिलो ऊर्जा परिदृश्यलाई बढावा दिने ग्लोबल इक्विटी फन्डको प्रतिबद्धतालाई सुदृढ बनाउँछ।’
ग्लोबल इक्विटी फण्डका प्रबन्ध निर्देशक डा. मनिष थापाले घाम ऊर्जा सेवामा अफ-ग्रिड रुफटप सौर्य परियोजना विस्तार गर्न ग्लोबल इक्विटी फन्डको यो लगानीले स्वच्छ बिजुली उत्पादन गर्न, ग्रिडमा निर्भरता कम गर्न र अझ दिगो भविष्यमा योगदान पुयाउन प्रतिबद्ध रहेको बताए।
नेपालमा जलविद्युतको उल्लेखनीय सम्भावना भएतापनि, यसको वर्तमान ऊर्जा उत्पादनले उद्योगहरूको माग पूरा गर्न संघर्ष गरिरहेको छ, जसले गर्दा डिजेल जेनेरेटरमा निर्भरता बढ्दै गएको छ र बारम्बार बिजुली कटौती भइरहेको छ। यसले तिनीहरूको कार्बन फुटप्रिन्टर सञ्चालन लागतलाई अझ बढाउँछ, जसले वातावरण र अर्थतन्त्र दुवैमा नकारात्मक प्रभाव पार्छ ।
घाम पावर नेपालका सीईओ अञ्जल निरौलाले घाम ऊर्जामा ग्लोबल इक्विटी फन्डको यो लगानीले नेपाली उद्योगहरूलाई बिजुलीको लागि हरियो विकल्पहरूमा परिवर्तन गरेर र सुरक्षित भविष्यको लागि दिगो अभ्यासहरू अपनाएर उनीहरूको समस्या समाधान गर्न सहयोग गर्न सक्ने उल्लेख गरे ।
