हालै सम्पन्न निर्वाचनको नतिजाले नेपालमा स्थिर सरकार हुने पक्का भएसंगै विदेशमा रहेका नेपाली मूलका व्यवसायी पनि उत्साहित भएका छन् । यसै क्रममा नेपाल र युरोपलाई सिधा हवाई उडानमार्फत जोड्न लागि पहल गरिरहेको हिमालय जेटले नयाँ राजनीतिक स्थिरता र सकारात्मक वातावरणसँगै आफु अगाडि बढ्न तयार रहेको बताएको छ।
हिमालय जेटका अध्यक्ष दिपेन्द्र गुरुङले एक संदेश जारी गर्दै हिमालय जेटले नेपाललाई बेलायत, युरोप र अष्ट्रेलियासँग प्रत्यक्ष long-haul उडानमार्फत जोड्ने ऐतिहासिक पहल अघि बढाइरहेको बताएका हुन्। यस अघि यो योजना विभिन्न कारणले ढिलाई भए पनि अब नयाँ स्थिर सरकार आउने भएसँगै अब यो योजना तिब्र गतिमा अगाडि बढ्ने उनको भनाई छ।
उनी भन्छन् ‘सन् २०१३ देखि नेपाली एयरलाइन्सहरू युरोपियन युनियनको Air Safety List मा रहेका कारण उनीहरूले युरोपमा प्रत्यक्ष उडान सञ्चालन गर्न सकेका छैनन्। यसका कारण युरोप, विशेषगरी संयुक्त अधिराज्य (UK) बाट नेपाल आउने यात्रुहरूले धेरै पटक ट्रान्जिट गर्दै करिब १७ घण्टासम्मको लामो र थकाइपूर्ण यात्रा गर्नुपर्ने अवस्था रहेको छ। हिमालहरूको देश, भगवान बुद्धको जन्मभूमि, तथा अद्वितीय प्राकृतिक सौन्दर्यले भरिपूर्ण राष्ट्रका रूपमा नेपालले आफ्नो वास्तविक सम्भावनालाई विश्वसँग पूर्ण रूपमा बाँड्न नपाउनु दुःखद वास्तविकता रह्यो। ‘
उनले नयाँ सरकारसमक्ष “Visit Nepal 2028” राष्ट्रिय पर्यटन अभियान सुरु गर्ने प्रस्ताव पनि गरेका छन् । यस अभियानले नेपालको संस्कृति, सम्पदा र हिमालयलाई विश्वसामु प्रस्तुत गर्ने अवसर मिल्ने उनको भनाई छ।
अध्यक्ष गुरुङका अनुसार लण्डन, पेरिस, फ्र्याङ्कफर्ट, म्याड्रिड, लिस्बन, सिड्नी, मेलबर्न र पर्थसँगको प्रत्यक्ष सम्पर्कले वार्षिक करिब १० लाख यात्रु नेपाल ल्याउन सक्ने अनुमान गरिएको छ, जसमा ५ लाखभन्दा बढी अन्तर्राष्ट्रिय पर्यटक हुनेछन्। प्रत्यक्ष उडानले लण्डन–काठमाडौं यात्रा करिब ९ घण्टा ४५ मिनेट र युरोप–काठमाडौं करिब ८ घण्टा ४५ मिनेटमा सम्भव बनाउने उनको भनाई छ।
उनले भनेका छन् ‘यस पहलले नेपालको पर्यटन र उड्डयन इकोसिस्टममा रूपान्तरणकारी आर्थिक प्रभाव पार्न सक्छ। होटल तथा रिसोर्ट लगानी, ट्रेकिङ तथा साहसिक पर्यटन, उड्डयन र विमानस्थल विकास, आतिथ्य सेवा, हस्तकला, खुद्रा व्यापार, ग्रामीण पर्यटन तथा हवाई कार्गो जस्ता क्षेत्रमार्फत पर्यटनले दीर्घकालमा नेपालको GDP मा २५–३०% योगदान पुर्याउन सक्ने अनुमान गरिएको छ। यसबाट १ लाखभन्दा बढी रोजगारी सिर्जना हुने अपेक्षा गरिएको छ। ‘
साथै विश्वभरका नेपालीलाई सहज रूपमा मातृभूमिसँग जोड्न FNPL (Fly Now Pay Later) टिकटिङ सुविधा CSR पहलका रूपमा सुरु गर्ने योजना पनि रहेको पनि गुरुङले उल्लेख गरेका छन्। जिम्मेवार हवाई सम्पर्कमार्फत Himalaya Jet ले संयुक्त राष्ट्रसंघका दिगो विकास लक्ष्यहरू—SDG 8, SDG 9, SDG 12, SDG 13 र SDG 17—लाई समर्थन गर्दै हिमालयप्रति विश्वको ध्यान पुनः केन्द्रित गर्ने नयाँ अध्यायको सुरुवात गर्ने लक्ष्य रहेको गुरुङले बताएका छन्। यसरी Himalaya Jet नेपालका लागि पर्यटन, उड्डयन सम्पर्क र राष्ट्रिय समृद्धिको वास्तविक game changer बन्ने विश्वास गुरुङले व्यक्त गरेका छन्।
