चालु आर्थिक वर्ष २०८२/८३ को पहिलो ७ महिनाको अवधिमा वाणिज्य बैंकहरुले ३८ अर्ब बढी खुद नाफा कमाएका छन् । नेपाल राष्ट्र बैंकको पछिल्लो तथ्यांक अनुसार संचालनमा रहेका २० वाणिज्य बैंकहरुले २०८२ साउन देखि २०८२ माघसम्मको अवधिमा कुल ३८ अर्ब १ करोड ६६ लाख रुपैयाँ खुद नाफा कमाएका हुन् ।
अघिल्लो आर्थिक वर्षको यसै अवधिको तुलनामा बैंकहरुको खुद नाफा ५.४० प्रतिशतले बढेको हो । अघिल्लो आर्थिक वर्षको यसै अवधिमा बैंकहरुको खुद नाफा ३६ अर्ब ६ करोड थियो।
चालु आर्थिक वर्षको पहिलो ७ महिनामा नबिल बैंकले सबैभन्दा धेरै ५ अर्ब ३८ करोड खुद नाफा कमाएको छ। त्यस्तै ग्लोबल आईएमई बैंकले ४ अर्ब १४ करोड, तथा कुमारी बैंकले ३ अर्ब १७ करोड खुद नाफा कमाएको छ।
यस अवधिमा लक्ष्मी सनराइज बैंकको खुद नाफा सबैभन्दा कम अर्थात् २४ करोड २७ लाख रहेको छ। त्यस्तै एनआईसी एशिया बैंकले ४४ करोड ३० लाख खुद नाफा कमाउँदा सिटिजन्स बैंकले ५७ करोड ६९ लाख खुद नाफा कमाएका छन् ।
आर्थिक वर्ष २०८१ माघ र २०८२ माघको अपरिस्कृत खुद नाफा तुलना गर्दा प्रतिशतको आधारमा कुमारी बैंकको खुद नाफा सर्वाधिक ३२९.८६ प्रतिशतले बढेको छ। त्यस्तै सिद्धार्थ बैंकको खुद नाफा ९९.५७ प्रतिशत तथा राष्ट्रिय वाणिज्य बैंकको खुद नाफा ५२.४६ प्रतिशतले बढेको छ।
आर्थिक वर्ष २०८१ माघ र २०८२ माघको अपरिस्कृत खुद नाफा तुलना गर्दा प्रतिशतको आधारमा १० वटा बैंकको खुद नाफा घटेको छ। जस मध्ये लक्ष्मी सनराइज बैंकको खुद नाफा ८४.७३ प्रतिशत घटेको छ भने नेपाल इन्भेष्टमेन्ट मेगा बैंकको खुद नाफा ३६.१८ प्रतिशत घटेको छ। त्यस्तै सिटिजन्स बैंकको खुद नाफा ३६.०९ प्रतिशत घटेको छ भने प्रभु बैंकको खुद नाफा २५.६६ प्रतिशत घटेको छ।
हेर्नुस् चालु आर्थिक वर्ष २०८१/८२ र २०८२/८३ को पहिलो ७ महिनामा वाणिज्य बैंकको खुदनाफाको तुलनात्मक विवरण । रकम रु. १० लाखमा देखाईएको छ।
