साताको पहिलो दिन आज आइतबार शेयरबजार परिसूचक नेप्से तेहोरो अंकले घटेको छ। आज नेप्से सूचक १०५.५० अंकले घटेर २६७६.६८ अंकको बिन्दुमा पुगेको छ।
आज कारोबारमा आएका ३४५ कम्पनीका ३ करोड १२ लाख ६ हजार १ सय ६२ कित्ता शेयर खरिद बिक्रीबाट १२ अर्ब ३८ करोड ९ लाख १४ हजार ५ सय ७० रुपैयाँ ४७ पैसाको कारोबार भएको छ। जस मध्ये हिमालयन रिइन्स्योरेन्सको सर्वाधिक ५८ करोड २८ लाखको कारोबार भएको छ भने शिवम सिमेन्टको ४५ करोड २५ लाखको कारोबार भएको छ।
आज कारोबारमा आएका मध्ये रिलायन्स स्पिनिंग मिल्स, भुजुंग हाइड्रो, रिजलाइन इनर्जी, र होटेल फरेस्ट इनको शेयर मूल्य सर्वाधिक १० प्रतिशतले बढेको छ। आज कारोबारमा आएका मध्ये नारायणी डेभलपमेन्ट बैंक, हिमालयन रिइन्स्योरेन्स, र भूगोल इनर्जीको शेयर मूल्य १० प्रतिशतले घटेको छ। आज कारोबारमा आएका सबै समुहगत सूचक घटेका छन् ।
सरकारले सम्पत्ति सुद्धीकरण सम्बन्धि अनुसन्धान तिब्र बनाएसंगै लगानीकर्ता त्रसित बनेका छन् । सम्पत्ति सुद्धीकरण अनुसन्धान विभागले व्यवसायी दीपक भट्ट, शंकर अग्रवाल, सुलभ अग्रवाल लगायतलाई पक्राउ गरेको छ।
भट्ट हिमालयन रिइन्स्योरेन्स लगायत विभिन्न कम्पनीमा शेयरधनी छन् । विभागको प्रारम्भिक अनुसन्धानबाट भट्टले ३ अर्ब ८१ करोड अनिमिताता गरेको देखिएको छ। विभागका अनुसार भट्टले दोस्रो बजारबाट नेपाल रिइन्स्योरेन्स कम्पनी लगायतका शेयर खरिद गर्न हिमालयन रिइन्स्योरेन्सको २ अर्ब ७३ करोड ३३ लाख रुपैयाँ, यसकै सहायक कम्पनी हिमालयन सेक्युरिटिज बैकरको २२ करोड १९ लाख रुपैयाँ, एचएलआई लार्ज क्याप फण्डको २५ करोड १४ लाख, र नेपाल माइक्रो इन्सुरेन्स कम्पनीको १६ करोड १७ लाख रकम दुरुपयोग गरेको देखिएको छ । उनले यी कम्पनीहरुको रकम दुरुपयोग गरेर ब्रोकर नम्बर ५५ भृकुटी स्टक ब्रोकिङ कम्पनी मार्फत शेयर खरिद गरि भुक्तानी गरेको विभागको प्रारम्भिक अनुसन्धानले देखाएको छ।
यस प्रकरणमा अन्य थप व्यवसायीहरु पनि तानिने चर्चा छ ।
