सागर डिस्टिलरी लिमिटेडको शेयर मूल्य २ हजार रुपैयाँ नजिक पुगेको छ । आज बुधबार कम्पनीको शेयर मूल्य १० प्रतिशतले बढेसंगै कम्पनीको शेयर मूल्य १९५१.८० रुपैयाँ पुगेको छ।
आज सहित कम्पनीको शेयर मूल्यमा १९ औ पटक पोजेटिभ सर्किट लागेको हो। कारोबारमा आएदेखि कम्पनीको शेयरमा हरेक दिन पोजेटिभ सर्किट लाग्दै आएको छ।
कार्तिक २३ गते कम्पनीको पहिलो कारोबार ३१९.५ रुपैयाँमा भएको थियो। सोहि दिन देखि कम्पनीको शेयरमा आजसम्म निरन्तर सर्किट लागेको हो। यस हिसाबमा कम्पनीको शेयरमा लगातार १९ औं सर्किट लागेको छ।
नेप्सेमा कम्पनीको ७२ लाख ६० हजार कित्ता शेयर सूचीकृत छ । कम्पनीले भदौ ३० गतेदेखि असोज ५ गतेसम्म आम सर्वसाधारणलाई ११ लाख ९० हजार ६ सय ४० कित्ता शेयर निष्काशन गरेको थियो।
यो कम्पनी वि.सं. २०६९ सालमा यो कम्पनी स्थापना भएको हो । यस कम्पनीको फ्याक्ट्री देवचुली, नवलपुरमा रहेको छ । सागर डिष्टिलरीले मदिराजन्य उत्पादनहरु तयार पार्दछ । कम्पनीले Royal Blue, Grey Wolf, / Berries & Blues लगायतका ब्राण्डको मदिरा उत्पादन गरिरहेको छ । कम्पनीले ‘नेप्से बुल्स’ र ‘द गभर्नर’ नामको नामको प्रिमियम व्हिस्की पनि उत्पादन गरिरहेको छ ।
कम्पनीकी अध्यक्ष अल्का गोयल हुन् भने अन्य संचालकमा आशुतोष खेतान, राजीव प्याकुरेल, र रतन कुमार चौधरी छन् । ज्योति दाहाल कम्पनीको स्वतन्त्र संचालक हुन् ।
