नेपाल धितोपत्र बोर्डले नेप्सेमा सूचीकृत इन्भेष्टमेन्ट कम्पनीहरुले दोस्रो बजारमार्फत कुनै पनि कम्पनीको शेयर खरिद गर्न नपाउने व्यस्था गरेको छ । बोर्डले २०७५ मङ्सिर १२ गते र २०७६ वैशाख ३० गते नै यसबारेको निर्णय गरेको थियो ।
बोर्डले २०८१ फागुन २२ गते सम्पूर्ण निष्काशन तथा बिक्री प्रबन्धकहरुलाई पत्राचार गर्दै यस व्यवस्थाको कार्यान्वयनको लागि निर्देशन दिएको छ ।
पछिल्लो समय एनआरएन इन्फ्रास्ट्रक्चर एण्ड डेभलपमेण्ट लिमिटेडले लाइफ इन्योरेन्स कर्पोरेशनले लिलामीमा ल्याएको शेयरमा आवेदन दिएको थियो । एनआरएनले आवेदन दिएको मात्र नभई लिलामीमा आएको ९६ प्रतिशतभन्दा धेरै शेयर प्राप्त गरेको थियो। लाइफ इन्योरेन्स कर्पोरेशनले कुल ४ लाख ९२ हजार ५ सय ७७ कित्ता शेयर लिलाममा ल्याएकोमा एनआएएनले ४ लाख ७५ हजार ७ सय कित्ता सेयर पाएको थियो। एनआरएनले धेरै शेयर महँगोमा खरिद गर्नको लागि लिलामीमा आवेदन दिएकोले लाइफ इन्स्योरेन्स कर्पोरेशनले लिलामीमा ल्याएको शेयरको कटअफ मूल्य १०२२ रुपैयाँ कायम भएको थियो।
तर नेपाल धितोपत्र बोर्डले इन्भेष्टमेन्ट कम्पनीहरुले दोस्रो बजारबाट शेयर खरिद गर्न नपाउने र लिलामीको शेयरमा पनि आवेदन दिन नसक्ने निर्णय कार्यान्वयन गर्न निर्देशन दिएपछि लाइफ इन्स्योरेन्स कर्पोरेशनले लिलामीमा ल्याएको शेयरहरु पुन: बाँडफाँड गरिएको थियो। एनआरएनले दिएका सबै आवेदन रद्द गरेर शेयर फेरि बाँडफाँड गर्दा कटअफ मूल्य घटेर ९६१ रुपैयाँ ५० पैसा कायम भएको थियो। एनआरएनले आवेदन दिएको सबै पैसा फिर्ता भएको थियो ।
धितोपत्र बोर्डका अनुसार प्रारम्भिक सार्वजनिक निष्काशन गर्न अनुमति प्राप्त लगानी कम्पनीले आर्थिक पूर्वाधार (उर्जा, यातायात र संचार) सँग सम्बन्धित संगठित संस्थाको संस्थापक शेयर बाहेक अन्य धितोपत्र र प्राथमिक तथा दोस्रो बजार मार्फत धितोपत्र खरिद गर्न पाउदैनन् ।
बोर्डले हालसम्म एनआरएन इन्फ्रास्ट्रक्चर एण्ड डेभलपमेण्ट लिमिटेड, सिइडिबी होल्डिङ्गस् लिमिटेड (साविक सिइडिबि हाइड्रोपावर डेभलपमेन्ट कम्पनी लिमिटेड), इमर्जिङ्ग नेपाल लिमिटेड र हाथवे इन्भेष्टमेण्ट नेपाल लिमिटेडलाई प्रारम्भिक सार्वजनिक निष्काशन गर्न अनुमति दिएको छ । यी कम्पनीहरुले लिलाम बढावड प्रक्रिया मार्फत शेयर खरिद गर्न नपाउने व्यवस्था रहेको बोर्डले प्रष्ट पारेको छ।
