चालु आर्थिक वर्ष २०८१/८२ को पाचौ महिनामा शेयर लगानीकर्ताले १ अर्ब बढी पुँजीगत लाभकर तिरेका छन् । २०८१ मङ्सिर महिनामा शेयर लगानीकर्ताले १ अर्ब ४ करोड ६ लाख २३ हजार ५ सय १४ रुपैयाँ ३६ पैसा बराबरको पुँजीगत लाभकर तिरेका हुन्।
जस मध्ये व्यक्तिगत लगानीकर्ताले तिरेको दीर्घकालीन पुँजीगत लाभकरको हिस्सा ३१ करोड ११ हजार ९ सय ७८ रुपैयाँ ०२ पैसा रहेको छ भने व्यक्तिगत लगानीकर्ताले तिरेको अल्पकालीन लाभकरको हिस्सा ६४ करोड २७ लाख ९१ हजार ६ सय ३ रुपैयाँ ७१ पैसा रहेको छ । कुल पुँजीगत लाभकरमा अल्पकालीन लगानीकर्ताले तिरेको पुँजीगत लाभकर ६१.७६ प्रतिशत रहेको छ ।
मङ्सिर महिनामा संस्थागत लगानीकर्ताले ८ करोड ७२ लाख १७ हजार ७ सय ६६ रुपैयाँ ३१ पैसा पुँजीगत लाभकर तिरेका छन् भने स्टक डिलरले ६ लाख २ हजार १ सय ६६ रुपैयाँ ३२ पैसा पुँजीगत लाभकर तिरेका छन् ।
२०८१ कार्तिक महिनामा शेयर लगानीकर्ताले ७५ करोड ८७ लाख पुँजीगत लाभकर तिरेका थिए । कार्तिक महिनाको तुलनामा मङ्सिरमा पुँजीगत लाभकर ३७.१४ प्रतिशतले बढेको हो ।
असोज महिनामा भने शेयर लगानीकर्ताले ५८ करोड ६५ लाख पुँजीगत लाभकर तिरेका थिए । तर असोज महिनामा दशैँ विदा, संविधान दिवसको विदा तथा इन्द्र जात्राको विदाको कारण कुल १६ दिन मात्र शेयर कारोबार भएको थियो ।
२०८१ भदौमा भने लगानीकर्ताले २ अर्ब ५७ करोड ९४ लाख ८० हजार ६ सय ७ रुपैयाँ ९७ पैसा बराबरको पुँजीगत लाभकर तिरेका थिए । २०८१ साउनमा लगानीकर्ताले ४ अर्ब २३ करोड ५३ लाख पुँजीगत लाभकर तिरेका थिए ।
