नेपाल दुई ठूला नेपाली कांग्रेस र नेकपा एमालेले सहकार्य गर्ने सहमति गरेपछि शेयर लगानीकर्ता उत्साहित भएका छन् । दुई ठूला दल सम्मिलित सरकार बन्ने र संविधान संशोधन समेत गर्ने सहमति बाहिर आएसँगै आज शेयरबजारमा उत्साह देखिएको हो ।
आज मंगलबार शेयर कारोबार खुल्ना साथ दुई पटकसम्म सर्किट ब्रेक लागेर केहि समयको लागि कारोबार रोकिएको थियो । दोस्रो सर्किट ब्रेक लागेर खुलेको बजारमा भने केहि इन्ट्रा डे करेक्सन सहित पुरै अवधि अर्थात् ३ बजेसम्म नै बजारमा कारोबार भएको छ ।
आजको कारोबारमा शेयर बजार परिसूचक नेप्से ४७.०४ अंकले बढेर २१००.४३ को बिन्दुमा पुगेर रोकिएको छ । आज कारोबारमा आएका ३१५ कम्पनीका १ करोड १६ लाख ४५ हजार ९ सय ५ कित्ता शेयर खरिद बिक्रीबाट ४ अर्ब ५७ करोड ६८ लाख ३१ हजार ७ सय २० रुपैयाँ ९ पैसाको कारोबार भएको छ । जस मध्ये एनआरएन इन्फ्रास्ट्रकचर एण्ड डेभलपमेन्टको सर्वाधिक १२ करोड ३३ लाख, गुडविल फाइनान्सको ११ करोड १० लाख, युनाइटेड इदी मार्दीको १० करोड ६९ लाख तथा हिमालयन रिइन्स्योरेन्सको १० करोड ९ लाखको कारोबार भएको छ ।
आज हिमालयन डिस्टिलरीको शेयर मूल्य सर्वाधिक ८.५४ प्रतिशतले बढेको छ भने समाज लघुवित्तको शेयर मूल्य ६.९६ प्रतिशत तथा गुडविल फाइनान्सको शेयर मूल्य ५.७४ प्रतिशत बढेको छ । त्यस्तै नेशनल हाइड्रोको शेयर मूल;या ५.५१ प्रतिशत बढेको छ ।
आज उपकार लघुवित्तको शेयर मूल्य सर्वाधिक ६.४६ प्रतिशत, तथा हिमालयन उर्जा विकास कम्पनीको शेयर मूल्य ६.२१ प्रतिशत घटेको छ ।
आज कारोबारमा आएका सबै समुहगत सूचक बढेका छन् । जस मध्ये उत्पादन तथा प्रशोधन समुह सर्वाधिक ३.३० प्रतिशत, ट्रेडिङ समुह ३.१२ प्रतिशत तथा वाणिज्य बैंक समुह ३.०३ प्रतिशतले बढेको छ ।
