नेपाल अटोमोबाइल्स एसोसिएसन अफ नेपालको आयोजनामा आजदेखि नाडा अटो शो २०२४ सुरु भएको छ । प्रदर्शनीको नेपाल सरकारका उपप्रधान तथा अर्थमन्त्री विष्णु प्रसाद पौडेलले उद्घाटन गरेका हुन् ।
कार्यक्रम उद्घाटन गर्दै मन्त्री पौडेलले अटोमोबाइल क्षेत्रलाई सरकारको पूर्ण संरक्षण रहने बताए । उनले अटोमोबाइल क्षेत्रलाई उद्योगसँग जोड्न नीतिगत समर्थन गर्ने वचन पनि दिएका छन्। उनले निर्माण क्षेत्रको समस्या र अटो क्षेत्रमा देखिएका अन्य चुनौतीहरूको सामना गर्न सरकार दृढ रहेको उल्लेख गरे।
नाडाका अध्यक्ष करण चौधरीले सन्दर्भ मूल्यसूची खारेज गर्नुपर्ने र अवैध व्यापार रोक्नका लागि बोर्डर टाइट गर्नुपर्ने बताए । उनले अटोमोबाइल क्षेत्रलाई नीतिगत स्थिरता र दीर्घकालीन योजना आवश्यक रहेको उल्लेख गरे । साथै हाइब्रिड र इभी सवारीसाधनहरूको प्रवर्द्धनका लागि स्थिर नीति चाहिने बताए । अटोमोबाइललाई विलासी वस्तु नभएर, रोजगारी सिर्जना गर्ने र राजस्वमा उल्लेखनीय योगदान दिने क्षेत्रको रुपमा लिनु पर्ने बताए ।
टाटा.ईभी मुख्य प्रायोजक रहेको अटो शो काठमाडौँको भृकुटीमण्डपमा सुरु भएको हो। यस वर्षको प्रदर्शनीमा २४ चार–पाङ्ग्रे ब्रान्डहरू, १९ दुई–पाङ्ग्रे ब्रान्डहरू र १२ हल्का व्यावसायिक सवारी साधन ब्रान्डहरू प्रदर्शनमा रहने छन् । साथै लुब्रिकेन्ट, टायर, ब्याट्री, ग्यारेज उपकरण र अन्य अटो कम्पोनेन्टहरूका ३३ कम्पनीहरू रहने छन् । यसका अलावा ७ वित्तीय संस्थाहरूले नाडा अटो शोमा गाडी खरिद गर्ने तथा बुकिङ गर्नेहरुलाई फाइनान्सिङ सम्बन्धि सुविधाहरु प्रदान गर्नेछन् । कुल ९५ प्रदर्शकहरूले १३० स्टलमार्फत आफ्ना अटो सम्बन्धि वस्तुहरु प्रदर्शनी गर्नेछन् ।
चाडपर्वको मौसम नजिकिँदै गर्दा, यस अटो शोले अटोमोबाइल प्रेमीहरूका लागि नयाँ मोडेल र प्रविधिहरूबारे जानकारी पाउने अवसर प्रदान गर्ने नाडाले जनाएको छ । नाडा अटो शो पहिलेभन्दा भव्य रुपमा सुरु भएको र यसपालीको अटो शो विगतका वर्षहरुको भन्दा प्रभावशाली हुने अपेक्षा नाडाको छ ।
६ दिनसम्म चल्ने अटो शोमा ७५ हजारले अवलोकन गर्ने अपेक्षा गरिएको छ । अवलोकनकर्तामध्ये एक जना भाग्यशाली सहभागीले हिरो जुम स्कूटर जित्ने अवसर पाउनेछन् ।
नाडाले यो प्रदर्शनीलाई केवल प्रदर्शनी मात्रै नभई नवीनता र नेपाली अटोमोबाइल्स उद्योगको दीगो आत्माको उत्सवका रुपमा लिएको छ ।
