जेन्जी आन्दोलनको क्रममा क्षतिग्रस्त बनेको हिल्टन होटेलको पुनर्बीमा प्रकरणमा नेपाल बीमा प्राधिकरणले विभिन्न ४ वटा कम्पनीलाई कारवाही गरेको छ। बीमा ऐनमा भएको व्यवस्था विपरितको कार्य गरेको भन्दै प्राधिकरणको संचालक समितिको बैठकले ४ वटा कम्पनीलाई कारवाहीको निर्णय गरेको हो ।
बीमा प्राधिकरणकी प्रवक्ता पुजन ढुंगेलका अनुसार ४ वटा कम्पनीलाई उनीहरुले गरेको कसुरको आधारमा छुट्टाछुट्टै खालको जरिवानाको निर्णय भएको छ। जसमा हिमालयन रिइन्स्योरेन्स र दी ओरियन्टल इन्स्योरेन्सलाई समान २ लाख नगद जरिवाना गरिएको छ। त्यस्तै नेपाल पुनर्बीमा कम्पनीका प्रमुख कार्यकारी अधिकृत सुरेन्द्र थापालाई बीमा ऐनमा भएको व्यवस्था बमोजिम कबुलियत गराउने कारवाही गरिएको छ । त्यस्तै एलियन्ट पुनर्बीमा ब्रोकर कम्पनीको लाइसेन्स तीन महिनालाई निलम्बन गरिएको छ ।
भएको के हो ?
जेन्जी आन्दोलनको क्रममा हिल्टन होटेल क्षतिग्रस्त बनेको थियो । होटेलले दी ओरियन्टल इस्योरेन्समा बीमा दाबी गरेकोले होटेलले सो कम्पनीसंग ६ अर्ब बीमा दाबी रकम माग गर्यो । ओरियन्टल इन्स्योरेन्सले होटेलको हुलदंगा तथा आतंकवाद जोखिमको पुनर्बीमा भने एलियन्ट पुनर्बीमा ब्रोकरमार्फत हिमालयन रिमा गरेको थियो । तर ओरियन्टल इन्स्योरेन्सले बीमा दाबी भने हिमालयन रि मा नगरी नेपाल पुनर्बीमा कम्पनी गर्यो ।
प्राधिकरणले ०८० असार २९ गते हुलदंगा तथा आतंकवाद जोखिमको पुनर्बीमा नेपाल रिमा मात्रै हुने गरि निर्देशन दिएको थियो । तर हिल्टन होटेलको हुलदंगा तथा आतंकवाद जोखिमको पुनर्बीमा कानून विपरित हिमालयन रि मा गरेको पाइएकोले यसमा संलग्न भएकाहरु कारवाहीमा परेका हुन् । कारवाही अघि प्राधिकरणले सबै कम्पनीलाई स्पष्टीकरण सोधेको थियो । जवाफ चित्तबुझ्दो नभएपछि कारबाही गरिएको प्राधिकरणले जनाएको छ।
साथै हुलदंगा तथा आतंकवाद जोखिमको पुनर्बीमा हिमालयन रि मै गरेकोले अब हिल्टन होटेलको दाबी भुक्तानी हिमालयन रिइन्स्योरेन्सले नै बेहोर्नु पर्ने देखिएको छ ।
अन्य ४ कम्पनी पनि कारवाहीमा
बीमा प्राधिकरणले अन्य ४ कम्पनीलाई पनि कारवाही गरेको छ। बीमा ऐनको व्यवस्था बमोजिम कार्य नगरेको पाइएकोले एसियन लाइफ इन्स्योरेन्स, हिमालयन लाइफ इन्स्योरेन्स, नेको इन्स्योरेन्स, र नेपाली लाइफ इन्स्योरेन्सलाई पनि समान २ लाख जरिवाना गरिएको प्राधिकरणकी प्रवक्ता ढुंगेलले जानकारी दिइन्।
