जेनजी आन्दोलनका क्रममा प्रदर्शनकारीबाट तोडफोड र आगजनी भएपछि बन्द भएको पूर्वी नवलपरासीको गैंडाकोटस्थित मौलाकाली केबलकार सञ्चालनमा आएको छ ।
भदौ २४ गते तोडफोड र आगजनीपछि केबलकारको बटमस्टेशनमा क्षति पुगेको थियो । करोडौँको क्षति पुगेपछि बन्द गरेर स्टेशनको मर्मत थालिएको थियो । मर्मत सकेर शनिबारदेखि केबलकार व्यवसायिक रूपमा सञ्चालनमा आएको स्टेशन म्यानेजर सुरज पौडेलले जानकारी दिए । केबलकार निर्माता कम्पनी अष्ट्रियाको डोपलमायरबाट सामानसहित प्राविधिकहरु ल्याएर मर्मत गरिएको उनको भनाइ छ ।
उनका अनुसार अब केबलकार पूर्ववत तालिका अनुसार बिहान ६ बजेदेखि राति १० बजेसम्म सञ्चालन हुनेछ ।
यसअघि केबलकार बन्द हुँदा मौलाकालिका मन्दिरमा आउने भक्तजनको संख्यासमेत घटेको थियो । केबलकार सञ्चालनमा आएपछि मन्दिरमा आउने भक्तजनको संख्यामा ३० प्रतिशतभन्दा बढीले वृद्धि भएकोमा केबलकार नचल्दा मन्दिरमा भक्तजन घटेका थिए ।
२०८० साल वैशाखदेखि सञ्चालनमा आएको मौलाकाली केबलकारबाट करिब ६ लाखले सेवा लिइसकेका छन् ।
