असोज १०, ११ र १२ गतेको भिषण बाढीबाट क्षतिग्रस्त बनेको सिन्धुलीको मूलकोटस्थित क्वालिटी बिच रिसोर्ट साढे ४ महिनापछि सञ्चालनमा आएको छ । रिसोर्टका सञ्चालक राजेश श्रेष्ठका अनुसार शुक्रबारबाट रिसोर्ट सञ्चालनमा आएको हो ।
सञ्चालक श्रेष्ठका अनुसार रेस्टुरेन्ट, कोठाहरु, रिसेप्सन र स्वीमिङ पुल सञ्चालनमा ल्याइएको छ । सोना पनि केही दिनमै सञ्चालनमा ल्याइने उनको भनाइ छ । जीम र स्पा पनि केही दिनमै सञ्चालनमा आउने र अबको १ महिनाभित्र रिसोर्ट पूर्ण रुपमा बाढी पूर्वकै अवस्थामा फर्किने श्रेष्ठ बताउँछन् ।
२०७८ चैत २ बाट सञ्चालनमा आएको यो रिसोर्ट बीपी राजमार्गको सौन्दर्यसमेत बनेको थियो । करिब २५ रोपनी क्षेत्रफलमा फैलिएको रिसोर्ट त्यतिबेला लगानीकर्ताहरुले करिब ४० करोड रुपैयाँ लागतमा सञ्चालनमा ल्याएका थिए । अहिले बाढीले क्षति गरेपछि सुरक्षा प्रबन्धसहित रिसोर्ट पुनःसञ्चालनमा ल्याइएको हो । यसका लागि हालसम्म ७ करोड खर्च भइसकेको छ भने अझै ३ करोड हाराहारी खर्च हुने अनुमान गरिएको छ ।
‘सेफ्टीको लागि सुनकोशी तिरबाट १० फिट बढी उचाइको छेकबार बनाउँदैछौँ, केही दिनमै यो पनि सकिन्छ’ श्रेष्ठले थपे, ‘डुबानमा परेर रिसोर्टभित्र थुप्रिएको बालुवा र माटो निकाल्नै समय लाग्यो ।’
यो पनिः
सिद्धार्थ प्रिमीयरमा बीमा रहेको ‘क्वालिटी बिच रिसोर्ट’मा बाढीको क्षति कति ?
क्वालिटी बिच रिसोर्ट बिपी राजमार्ग भएर यात्रा गर्ने आन्तरिक पर्यटकहरुको रोजाईमा पर्दै आएको रिसोर्ट हो । काठमाडौँबाट पूर्वी नेपालको यात्रामा निस्कनेहरु र घुमफिर गरेर फर्किनेहरु रिसोर्टमा बास बस्ने गर्दछन् । परिवारसहित एक दिने घुमफिरमा निस्कनेहरु पनि क्वालिटी बिच रिसोर्टमा पुगेर स्वीमिङ र र्याफ्टिङ गरेर फर्किने गर्दछन् ।
‘रिफ्रेशमेन्ट’देखि ठूला ठूला कम्पनीहरुले आफ्ना गोष्ठी तथा सेमिनारहरु पनि यो रिसोर्टमा गर्दै आएका छन् । स्थलमार्ग हुँदै नेपाल आउने भारतीय पर्यटकहरुसमेत यस रिसोर्टमा बसेर रमाउने गर्दछन् । बैशाखको बुकिङ अहिलेदेखि नै सुरु भइसकेको रिसोर्टका सञ्चालक श्रेष्ठ बताउँछन् ।
साथै, पर्यटकीय सिजनमा रामेछापको मन्थलीस्थित विमानस्थलबाट लुक्लाको हवाई उडान हुँदा काठमाडौँबाट गाडीमा गएका पर्यटकहरु पनि सोही रिसोर्टमा बसेर भोलीपल्ट उडान समय अनुकुल हुने गरि रामेछाप पुग्ने गर्दथे । यो रिसोर्टमा १ सय भन्दा बढी कोठाहरु छन् भने पार्टीका लागि भव्य बैंक्वेट हल र कार्यक्रम तथा गोष्ठीका लागि प्रशस्त क्षमताको सेमिनार हल पनि उपलब्ध छ ।
