काठमाडौँको ‘सुकेधारा’लाई चक्रपथ (रिङ–रोड)को ‘बस स्टप’का रुपमा मात्रै चिन्नेहरु धेरै छन् । सुकेधाराको प्राचीन सभ्यतालाई थाती राखेर लगानी, पूर्वाधार र व्यवसायिक गतिविधिका दृष्टिबाट यो क्षेत्रलाई हेर्ने हो भने खास पहिचान भेटिँदैन थियो । यसकारण आजभन्दा केही समय अगाडीसम्म सुकेधाराको पहिचान केवल चक्रपथ (रिङ–रोड)को एउटा ‘बस स्टप’का रुपमा मात्रै सिमित थियो ।
मानव वस्तीका लागि एउटा ‘प्राइम लोकेशन’ र काठमाडौँमा आएर विभिन्न पेशा व्यवसायमा आवद्ध भएकाहरु कोठा तथा घर भाडामा लिएर बस्नेहरुका लागि उपर्युक्त ठाउँ भएर पनि व्यवसायिक गतिविधिका दृष्टिकोणले सुकेधारा क्षेत्र तुलनात्मक रुपमा कमजोर नै थियो । ‘रिङ–रोड’भित्र भव्य तारे होटल र कयौँ सुविधासहितका व्यसायिक गतिविधि मौलाउँदा पनि सुकेधारा भने नाम जस्तै सुख्खा थियो । तर, अहिले सुकेधाराले आफ्नो पहिचान बदलेको मात्रै छैन, मुहार नै फेरेको छ भन्दा पनि अत्युक्ति हुँदैन होला ।
तारे होटलले गुल्जार बन्दै सुकेधारा
विगतमा गोपीकृष्ण चलचिल हलबाहेक यो क्षेत्र र आसपासमा ठूलो व्यवसायिक कारोबार हुने स्थल कम थिए । त्रिभुवन अन्तराष्ट्रिय विमानस्थलबाट छोटो दूरी, विश्व सम्पदा सूचीकृति भगवान पशुपतिनाथको मन्दिरबाट पनि नजिकै र ऐतिहासिक एवम् पुरातात्विक महत्वको बुढानीलकण्ठ मन्दिर लगायतका धार्मिक गन्तव्यबाट समेत नजिकै रहेर पनि सुकेधाराले व्यवसायिक क्षेत्रको परिचय बनाउन भने २०८० को दशक कुर्नुपर्यो ।
अहिले तारे होटलहरुको बाक्लो उपस्थितिले सुकेधारा र आसपासको क्षेत्रलाई गुल्जार बनाएको छ । अझ यसमा पनि विदेशी चेन होटल ब्राण्डहरुको आगमनले सुनमा सुगन्ध थपिदिएको छ । उदाहरणका लागि ‘मक्र्योर काठमाडौँ’लाई लिन सकिन्छ । दि मेट्रोपोलिटन होटल प्रा.लि.ले बनाएको उक्त होटल सुकेधाराकै मुटुमा अवस्थित छ । होटल व्यवसायमा विश्व प्रशिद्ध ‘एकोर ग्रुप’ले व्यवस्थापन सम्हालेको यस होटलमा १०४ कोठा छन् ।
‘एकोर ग्रुप’लाई नेपाल उद्योग वाणिज्य महासंघका कार्यसमिति सदस्य देशबन्धु बस्नेत (अजित)ले नेपाल भित्र्याएका हुन् । एसिया, युरोप, अफ्रिका एवम् मध्यपूर्वका ११० देशका ५ हजार ४ सय बढी होटलहरुको व्यवस्थापन सम्हालिरहेको एकोर ग्रुपको व्यवस्थापनमा सञ्चालनमा आएको ‘मक्र्योर काठमाडौँ’ले नेपाल आउने पर्यटकहरुलाई विश्वस्तरीय हस्पिटालिटी सेवा प्रदान गर्न थालिसकेको छ ।
विश्वकै सबैभन्दा प्रतिष्ठित मिड–स्केल ब्राण्ड मानिने मक्र्योरको आगमनले सिङ्गो नेपालको संस्कृतिक, प्राकृतिक तथा ऐतिहासिक महत्वलाई विश्वसामु पुर्याउन मद्दत पुग्ने आशा गर्न सकिन्छ ।
यसैगरि, सुकेधारा नजिकै पर्ने धुम्बाराहीमा पनि सुविधासम्पन्न होटल अकामा ‘रमडा बाइ वन्डिम’ विश्व विख्यात ब्राण्ड ‘रमडा’बाट सञ्चालनमा आएको छ । सानिमा ग्रुपबाट प्रवद्र्धित अकामा होटल ‘रमडा बाइ वन्डिम’ पनि पाँचतारे होटल नै हो । अमेरिक चेन होटल ब्राण्ड ‘रमडा बाइ वन्डिम’को नामबाट सञ्चालनमा आएको सो होटल ९ रोपनी क्षेत्रफलमा फैलिएको छ । १०८ कोठामा २ सय बेड रहेको होटलमा ५ वटा हल र ३ वटा रेष्टुरेष्ट छन् ।
विदेशी चेनमार्फत नेपालीपनको आतिथ्यता दिलाउने अभियानमा ‘लर्डस्’ होटल पनि सोही क्षेत्रमा आउँदैछ ।
गोपीकृष्णको पुर्नजीवन: जिकेसीसी
सुकेधाराबाट नजिकै गोपीकृष्ण चलचिल हल भत्काएर अहिले बिजनेश कम्प्लेक्ससहित होटल बनाउने काम अघि बढेको छ । उक्त हलका सञ्चालक उद्धव पौडेलले त्यहाँ पाँचतारे होटलसहित ‘गोपीकृष्ण कम्प्लेक्स सेन्टर’ (जिकेसीसी) बनाउँदैछन् ।
१० रोपनी जमिनमा बन्ने कम्प्लेक्समा २ तल्ला पार्किङसहित १८ तल्लाको भवन बनाउने बताइएको छ । जहाँ पाँचतारे होटलसहित सपिङ मल पनि सञ्चालनमा आउनेछ । यसले पनि सुकेधारा, कपन, चावहिलसहित धुम्बाराही र चक्रपथ क्षेत्रमा थप व्यवसायिक गतिविधि बढाउने देखिन्छ ।
महाराजगन्जमा होटल तथा अपार्टमेन्ट बनाउँदै कर्मा ग्रुप
कर्मा ग्रुप पनि हस्पिटालिटी क्षेत्रमा प्रवेश गरेको छ । गुड कर्मा ग्रुप अफ कम्पनीले महाराजगन्जमा मेरियटको नयाँ फ्रेन्चाइज ‘ले मेरिडियन’ फाइभ स्टार होटल र अपार्टमेन्ट बनाउँदैछ । कर्मा ग्रुपले होटलसँगै लक्जरी अपार्टमेन्ट बनाउन लागेको हो ।
महाराजगन्जस्थित काठमाडौँ भ्याली स्कुलको ११ रोपनी १ आना जग्गामा कर्मा ग्रुपले होटल र अपार्टमेन्ट बनाउन लागेको हो । ले मेरिडियन होटलमा १७० कोठा हुनेछन् भने आडैमा ८२ युनिटको लक्जरी अपार्टमेन्ट बन्ने कम्पनीले जनाएको छ ।
यसबाट कयौँवर्ष नाम जस्तै सुख्खा भएर बिताएको सुकेधारा अब भने होटलसहित अपार्टमेन्ट र बिजेनश कम्प्लेक्ससहितको व्यवसायिक ‘हब’ बन्दै गएको प्रष्ट हुन्छ ।
