सशस्त्र प्रहरीले भन्सार जाँचपास भइसकेका ७७४ वटा विद्युतीय गाडीहरु नियन्त्रणमा लिएको छ । तर, भन्सार विभाग वा सम्बन्धित भन्सार कार्यालयको जानकारी बिना र भन्सार प्रशासनसँग समन्वय नै नगरी गाडी नियन्त्रणमा लिएपछि अहिले सशस्त्र प्रहरीलाई आपत आइलागेको छ ।
सशस्त्रका प्रहरी नायब महानिरीक्षक विष्णु प्रसाद भट्टका अनुसार विभिन्न ब्राण्डका ७७४ वटा विद्युतीय गाडी नियन्त्रणमा लिइएको भएपनि अहिले ‘अब के गर्ने ? कहाँ बुझाउने ?’ भन्नेमा सशस्त्रले निर्णय गर्न सकेको छैन ।
‘अब ति गाडीहरु भन्सार विभागलाई बुझाउनु हुन्छ कि ? के गर्नुहुन्छ ?’ भन्ने बिजनेश पानाको जिज्ञासामा उनले भने, ‘जहाँबाट नियन्त्रणमा लिइएका हुन्, त्यतैतिर होल्ड गरिएका छन् । ठाउँ ठाउँमा होल्ड छन् गाडीहरु, भन्सारलाई बुझाउन पनि सम्भव छैन’ उनले भने, ‘अर्थ मन्त्रालयले अनुसन्धान गर्दैछ भन्ने सुनेका छौँ, उसले जे भन्छ, त्यहीँ गर्छौँ ।’
यता भन्सार विभागले भने सशस्त्रले गाडी नियन्त्रणमा लिएको बारे कुनै औपचारिक जानकारी नरहेको तर, समाचारमार्फत थाहा पाएको बताएको छ । सशस्त्रले पनि भन्सार प्रशासनसँग समन्वय नभएको संकेत गरेको छ । सशस्त्रका नायब महानिरीक्षकले नै यसको संकेत गरेका हुन् ।
भन्सार जाँचपास भइसकेका गाडीहरु नियन्त्रणमा लिएर सशस्त्रले नै होल्ड गर्नुपर्ने अवस्था आउनुले समन्वय नरहेको प्रष्ट भएको छ । भन्सार पास भइसकेको अवस्थामा सम्बन्धित वस्तु भन्दा पनि कागजात नियन्त्रण गर्नुपर्ने र त्यसका लागि पनि भन्सार विभागले शंकास्पद भनेपछि मात्रै प्रक्रिया अघि बढ्नुपर्नेमा सशस्त्रले कसको निर्देशनमा गाडी नै नियन्त्रणमा लिएको हो भन्ने खुलेको छैन ।
भन्सार जाँचपास भइसकेका वस्तुको सम्बन्धमा अनुसन्धान गर्ने निकाय भन्सार जाँचपास परीक्षण कार्यालय हो । भन्सार विभागले लिखित रुपमा शंकास्पद कारोबारको विवरण दिएपछि मात्रै यो कार्यालयले अनुसन्धान अघि बढाउने हो । अहिले सशस्त्रले नियन्त्रणमा लिएका ईभीका सम्बन्धमा भन्सार जाँचपास परीक्षण कार्यालय पनि अनविज्ञ देखिएको छ ।
