चालु आर्थिक वर्ष २०८२/०८३ को स्टार्टअप कर्जाका लागि ९६६ प्रस्ताव छनोट भएका छन् । औद्योगिक व्यवसाय विकास प्रतिष्ठानले ९६६ प्रस्तावक छनोट गरेको हो ।
कर्जा पाउनका लागि योग्य भएका प्रस्तावकले शुक्रबारसम्म तोकिएको बैंक शाखामा सम्पर्क गर्नुपर्नेछ । असार मसान्त पश्चात परियोजना प्रस्ताव र सिफारिस रकम स्वतः निष्क्रिय हुने भएकाले त्यस अगाडि नै कर्जा लिन पनि प्रतिष्ठानले आह्वान गरेको छ ।
कर्जा प्राप्तीका लागि छनोट भएका प्रस्तावकले अब व्यवसाय दर्ता र नवीकरणको सक्कल प्रमाणपत्र, प्यान÷भ्याट दर्ताको प्रमाणपत्र, उद्यमीको नागरिकताको सक्कल प्रमाणपत्र, आव २०८१/०८२ को करचुक्ताको प्रमाणपत्र र आधिकारिक व्यक्तिको पासपोर्ट साइजको फोटोसहित तोकिएको बैंक शाखामा सम्पर्क गर्नुपर्नेछ ।
यसअघि स्टार्टअप उद्यम कर्जा कार्यक्रम २०८२ का लागि १ हजार ३०१ प्रस्तावकले आवेदन दिएका थिए । त्यसपछि प्रतिष्ठानले आवेदकमध्येबाट कर्जा प्राप्त गर्न योग्य १ हजार २९८ परियोजनाको प्रारम्भिक सूची निकालेको थियो । उक्त सूचीमा परेकालाई प्रस्तुतीकरणका लागि आह्वान गरिएकोमा १ हजार १५६ परियोजनाका प्रस्तावकले मात्रै प्रस्तुतीकरणमा भाग लिएका थिए ।
११ सय ५६ प्रस्तावकहरुको प्रस्तुतीकरण पश्चात प्रतिष्ठानले ९६६ प्रस्ताव छनोट गरेको हो ।
चालु आर्थिक वर्षमा स्टार्टअप कर्जाबापत एक स्टार्टअप उद्यमीले ३ प्रतिशत ब्याजदरमा अधिकतम् २० लाख रुपैयाँसम्म बिना धितो कर्जा पाउनेछन् । यसअघि सरकारले ३ प्रतिशत ब्याजदरमा २५ लाख रुपैयाँसम्म स्टार्टअप कर्जा दिँदै आएको थियो ।
चालु आर्थिक वर्षका लागि स्वीकृत कार्यविधिअनुसार अधिकतम् सीमा २५ लाखबाट २० लाख कायम गरिएको छ । गतवर्ष स्टार्टअप कर्जाका लागि १ अर्ब रुपैयाँ बजेट विनियोजन गरिएकोमा चालु आर्थिक वर्षका लागि सरकारले जम्मा ७३ करोड मात्रै छुट्याएको छ ।
गत आर्थिक वर्ष २०८१/०८२ मा औद्योगिक व्यवसाय विकास प्रतिष्ठानले ६०० उद्यमीलाई ८८ करोड ६६ लाख २५ हजार रुपैयाँ कर्जा प्रदान गरेको थियो ।
