आर्थिक मन्दीको असरले करिब करिब थला परेको क्षेत्र हो रियल इस्टेट । यो क्षेत्र लामो समयदेखि मन्दीमा मारमा छ । जसका कारण नयाँ घर बन्ने क्रम कछुवाको गतीमा मात्रै छ । हाउजिङ र अपार्टमेन्ट परियोजना पनि खासै अघि बढ्न सकेका छैनन् ।
रियल इस्टेट क्षेत्रमा जमेका व्यवसायीहरुका अनुसार मन्दीका कारण काठमाडौँ उपत्यकामा जग्गाको मूल्य ४० प्रतिशतसम्म घटेको छ । पैसाको निकै खाँचो परेका, यताको सम्पत्ति सेटल गरेर विदेश जाने सोच बनाएका र दुइ÷तीन ठाउँमा जग्गा भएका तर घर नभएकाले अहिले ग्राहकले अफर गरेकै मूल्यमा जग्गा बिक्री गरेर हिड्न थालेको व्यवसायीहरु बताउँछन् ।
अहिले घर, घडेँरी जथा जग्गा बिक्री गर्न चाहनेहरु धेरै छन् । अझै मूल्य घट्न सक्छ भनेर उनीहरु बिक्री गन हतारिए पनि किन्न खोज्नेहरु भने अझै मूल्य घट्ला र किनौँला भनेर बसेको व्यवसायीहरुको भनाइ छ । तर, पछिल्ला दुइ महिना यता भने जग्गाको भाउ स्थिर देखिएको छ । बजेट र मौद्रिक नीति पर्खिएर बसेकाहरुले जग्गा होल्डमा राख्दा मूल्य स्थिर भएको उनीहरुको भनाइ छ । अहिले मौद्रिक नीतिले केही सहजता ल्याइदिएकाले अब मूल्य घट्न रोकिने यस क्षेत्रका व्यवसायीहरुको भनाइ छ ।
त्यसो त, बैंकले प्रवाह गर्ने कर्जाको ब्याजदर पनि अहिले निकै तल छ । एकातिर ऋण लिन सहज र अर्कातिर ब्याजदर पनि सस्तो भएकाले अब क्रमशः घरजग्गाको कारोबार बढ्ने अपेक्षा व्यवसायीहरुले गरेका छन् ।
लगत्तै, अहिले वर्षाको समय भएको र चाँडै चाडवाडको सिजन सुरु हुने भएकाले अब किनबेच तुलनात्मक रुपमा माथि नजाने भएपनि मूल्य भने अब नघट्ने बताइन्छ । यद्यपी, काठमाडौँभित्र तत्कालै नयाँ घर बने क्रम पनि नबढ्ने अनुमान गरिएको छ ।
