नेपाल महिला चेम्बरद्वारा महिला उद्यमशीलता बारेमा आयोजित छलफलमा सहभागी महिला उद्यमिहरुले उद्यमशीलता विकासमाथि जोड दिन आग्रह गरेका छन् । आगामी आर्थिक वर्ष २०८३÷०८४ को बजेटको पूर्वसन्ध्यामा आयोजित उक्त छलफल कार्यक्रममा सहभागी महिला उद्यमीहरूले महिला उद्यमशीलताको प्रवर्द्धन, क्षमता विकास तथा व्यवसाय विस्तारका लागि विशेष नीति तथा कार्यक्रम आवश्यक रहेको धारणा राखेका हुन् ।
कार्यक्रममा सहभागीहरूले महिला उद्यमशीलतासम्बन्धी कार्यक्रमहरूलाई अझ प्रभावकारी बनाउन नेपाल सरकार तथा निजी क्षेत्रको प्रतिनिधिमूलक संस्था नेपाल चेम्बर अफ कमर्स बीच समन्वय र सहकार्य विस्तार गर्नुपर्ने आवश्यकता औंल्याएका थिए ।
कार्यक्रममा नेपाल चेम्बर अफ कमर्सका अध्यक्ष कमलेश कुमार अग्रवालले नेपाल चेम्बर अफ कमर्सले आगामी बजेटमा महिला द्यमशीलता प्रवर्द्धनका लागि विशेष प्याकेज समावेश गर्न सरकारलाई सुझाव दिए । उनले महिलाहरूको आर्थिक सशक्तीकरणले समग्र राष्ट्रिय अर्थतन्त्रलाई समेत सकारात्मक दिशा दिने उल्लेख गर्दै महिला उद्यमीहरूको क्षमता, सिर्जनशीलता र नेतृत्वलाई प्रोत्साहन गर्न सकियो भने देशको आर्थिक विकासले थप गति लिने विश्वास व्यक्त गरे । उनले महिला उद्यमशीलताको प्रवर्द्धन अब विकल्प नभई आवश्यकता भएको बताए ।
त्यसैगरी नेपाल महिला चेम्बरकी अध्यक्ष एवम् नेपाल चेम्बर अफ कमर्सकि उपाध्यक्ष उर्मिला श्रेष्ठले महिला उद्यमीहरूले भोगिरहेका समस्या समाधान तथा प्रवर्द्धनात्मक कार्यक्रममार्फत महिलाहरूलाई थप प्रेरित गर्न नेपाल महिला चेम्बरले निरन्तर विभिन्न कार्यक्रम सञ्चालन गर्दै आएको बताइन् । उनले महिला उद्यमीहरूको वित्तीय पहुँच, बजार तथा तालिमसम्म सहज बनाउन सबै पक्षको सहकार्य अपरिहार्य रहेको बताएकी छिन् ।
कार्यक्रममा नेपाल चेम्बर अफ कमर्सका वरिष्ठ उपाध्यक्ष दिपक मल्होत्रा, उपाध्यक्षहरु दिपक श्रेष्ठ, सन्तोष कुमार पाण्डे, सुरेन्द्रकुमार श्रेष्ठ, अर्जुन प्रसाद शर्मा र नेपाल महिला चेम्बरकी उपाध्यक्ष स्वरुपा श्रेष्ठ एवं सचिव ईरा प्रसाईं लगायतको उपस्थिति रहेको थियो ।
