नेपाल उद्योग वाणिज्य महासंघ (एफएनसीसीआई)को चुनाव नजिकिँदो छ । चैत २९ र ३० गते आयोजना हुने साधारणसभा र निर्वाचनमार्फत नयाँ कार्यसमिति चयन हुँदैछ । विधान अनुसार हालका वरिष्ठ उपाध्यक्ष अन्जन श्रेष्ठ आगामी कार्यकालका लागि स्वतः अध्यक्ष बन्दैछन् ।
विगतमा वरिष्ठ उपाध्यक्षमा नै चुनाव केन्द्रित हुन्थ्यो । तर, अहिले वरिष्ठ उपाध्यक्षमा प्रत्यक्ष निर्वाचन नहुने भएपछि वस्तुगततर्फ चुनावी माहोल तातिएको छ । विगतमा एसोसियट र जिल्ला नगरतर्फ सबैभन्दा धेरै चुनावी माहोल देखिने गरेकोमा यसपाली भने वस्तुगतमा अस्वभाविक रस्साकस्सी चलेको छ ।
होटल होटलमा सचिवालय
वस्तुगत तर्फको उपाध्यक्षमा यसपाली शिवप्रसाद घिमिरे र नरेशलाल श्रेष्ठबीच प्रतिस्पर्धा हुँदैछ । उनीहरु दूबैले १६/१६ जना सदस्यका उम्मेदवारहरुको टिम नै तयार पारेर अहिले वस्तुगत संघहरुको कार्यालयमा घरदैलो गरिरहेका छन् ।
घिमिरे र श्रेष्ठ समूहबीच अहिले देखिएको प्रतिस्पर्धाले एसोसियट र जिल्ला नगर तर्फको चुनावी तयारी र माहोल छाँयामा परेको छ । दूबैले काठमाडौँका विभिन्न होटलहरुमा सचिवालय नै खडा गरेका छन् । बसेरा बुटिक होटल, नेपाली चुल्हो, मेलुङ थकाली र होलिडे इन जस्ता होटलहरु अहिले वस्तुगत तर्फका उम्मेदवारहरुको सचिवालय एवम् वस्तुगत तर्फका मतदाता उद्यमी व्यवसायीहरुको जमघटको केन्द्र बनेका छन् ।
अस्वभाविक खर्च
खासमा उद्योग वाणिज्य महासंघमा व्यवसायीहरुलाई चुनाव लागेको गत साउन–भदौ तिरबाटै हो । तर, भदौमा जेन् जी आन्दोलन भएपछि माहोल केही सुस्ताएको थियो । यद्यपी, असोजबाटै आकांक्षी व्यवसायीहरुले चुनाव लक्षित कार्यक्रम गर्न थालेका थिए ।
दशैँ तिहार लगत्तै आकांक्षीहरु टिम बनाउन केन्द्रित भए । मंसिरबाट त चुनावी कार्यक्रमको रफ्तार झन बढ्न थाल्यो । फागुन २१ मा प्रतिनिधिसभाको निर्वाचन सम्पन्न भएपछि महासंघको चुनावी गर्मीले माहोल हपक्कै तताएको छ ।
महिनौसम्म होटलमा सचिवालय राखिँदा र हरेक दिनजसो त्यहाँ हुने दिवाकालिन र रात्रीकालिन जमघटले उम्मेदवारहरुको खर्च ब्यापक रुपमा बढाएको व्यवसायीहरु नै बताउँछन् । ‘अहिले चुनाव नै वस्तुगतमा मात्रै लागेको छ, सचिवालय भनेर होटलहरु महिनौदेखि बुक गरिएका छन्’ एक जना वस्तुगत सदस्य संघका प्रतिनिधि भन्छन्, ‘वस्तुगतको उपाध्यक्षमा चुनाव लड्न ४ देखि ५ करोड रुपैयाँ जति खर्च हुने रहेछ ।’
तर, केही व्यवसायी भने मुलुकको आर्थिक अभिभारा बोकेका उद्योगी व्यवसायीहरुको संस्था भएकाले महासंघको चुनावी अभियानमा यत्तिको ‘ताउरमाउर’लाई अस्वभाविक मान्न नहुने बताउँछन् । रुद्राक्ष व्यवसायी संघका अध्यक्ष मनोज चापागाईं राष्ट्रिय र अन्तर्राष्ट्रिय स्तरका उद्योगी व्यवसायीहरु भएकाले उनीहरुको दौडधूपलाई असामान्य मान्न नहुने बताउँछन् ।
‘मुलुककै आर्थिक अभिभारा बोकेका व्यवसायीहरुको संस्था भएकाले यत्तिको ताउरमाउर देखिनुलाई अस्वभाविक मान्नु हुँदैन’ उनी भन्छन्, ‘बाहिरबाट हेरेर अनुमान गरिएजस्तो भड्किलो पनि छैन । सकेसम्म भड्किलो बनाउनु पनि हुँदैन ।’
पूर्व अध्यक्षहरु भन्छन्, ‘चुनाव भड्किलो हुन थाल्यो’
महासंघको चुनाव खर्चिलो हुन थालेपछि पूर्व अध्यक्ष तथा पूर्व पदाधिकारीहरुले भने चिन्ता व्यक्त गरेका छन् । पूर्व अध्यक्ष प्रदीप कुमार श्रेष्ठले निर्वाचनका नाममा उम्मेदवार बन्ने उद्योगी व्यवसायीहरुले तडकभडक र खर्चिला कार्यक्रमहरु गर्दा ‘पैसा हुनेले मात्रै चुनाव लड्नुपर्छ वा पैसा नभएकाले चुनाव लड्न सक्दैनन्’ भन्ने भाष्य स्थापित हुने खतरा औल्याएका छन् । उनले सार्वजनिक रुपमै उम्मेदवारहरुलाई भड्किला गतिविधि नगर्न अनुरोध पनि गरेका छन् ।
पूर्व अध्यक्ष कुशकुमार जोशीले पनि उम्मेदवारहरुबाट हुने खर्चिला गतिविधिले राम्रो सन्देश नजाने बताएका छन् । उनले चुनावी तयारीका लागि कार्यक्रम, भेटघाट र अन्तरक्रिया गर्नैपर्ने भएपनि यस्ता कार्यक्रमलाई मितब्यपी र कम खर्चिलो बनाउनुपर्ने बताएका छन् ।
