विद्युत प्राधिकरणले सवारी एसेम्बल उद्योगलाई व्यापारिक ग्राहक अन्तर्गतको शुल्क माग गरेपछि एसेम्बल उद्योगलाई विद्युत महशुलबापत नै चर्को भार पर्ने देखिएको छ । यस अघिसम्म औद्योगिक ग्राहकका रुपमा महशुल बुझाइरहेका एसेम्बल उद्योगहरुलाई प्राधिकरणले ‘तिमीहरु औद्योगिक ग्राहक होइनौ, व्यापारिक ग्राहक हौ’ भन्ने आशयको पत्र कार्तिक १८ गतेबाट पठाउन थालिसकेको छ । यस आधारमा अब एसेम्बल प्लान्टहरुले व्यापारिक ग्राहकको रुपमा महशुल तिर्नुपरेमा ठूलो भार थपिने देखिएको हो ।
हाल पिक समय (साँझ ५ बजेदेखि राती ११ बजेसम्म), अनपिक समय (राती ११ देखि बिहान ५ बजेसम्म) र अन्य समय (बिहान ५ देखि साँझ ५ बजेसम्म) गरी प्राधिकरणले समयलाई तीन भागमा वर्गीकरण गरेर ग्राहकको महशुल दर तोकेको छ । साथै, बैशाखदेखि मंसिर र पौषदेखि चैतसम्म भनेर एक वर्षलाई दुइ याममा वर्गीकरण गरिएको छ । यस अनुसार पनि महशुल दर निर्धारित छ । उक्त दरलाई विद्युत नियमन आयोगले स्वीकृत गरेको छ ।
जस अनुसार, १३२ के.भी. प्रशारण लाइनबाट टाइम अफ डे मिटर जडान गरेका औद्योगिक ग्राहकले डिमाण्ड शुल्क प्रति के.भी.ए. प्रति महिना २३० रुपैयाँ बुझाउनुपर्छ । इनर्जी शुल्कतर्फ साँझ ५ बजेदेखि राती ११ बजेसम्म विद्युत उपयोग गरेबापत प्रति युनिट १० रुपैयाँ, राती ११ देखि बिहान ५ बजेसम्म प्रति युनिट ४.६५ रुपैयाँ र बिहान ५ बजेदेखि साँझ ५ बजेसम्म प्रति युनिट ८.२० रुपैयाँ महशुल तिर्नुपर्छ ।
यस्तै, ६६ के.भी.बाट लाइन लिएका औद्योगिक ग्राहकले डिमाण्ड शुल्कबापत प्रति के.भी.ए. प्रति महिना २४० रुपैयाँ बुझाउनुपर्छ । इनर्जी शुल्कतर्फ साँझ ५ बजेदेखि राती ११ बजेसम्म प्रति युनिट १०.१० रुपैयाँ, राती ११ देखि बिहान ५ बजेसम्म प्रति युनिट ४.७५ रुपैयाँ र बिहान ५ बजेदेखि साँझ ५ बजेसम्म प्रति युनिट ८.३० रुपैयाँ महशुल तिर्नुपर्छ ।
महशुल निर्धारण आयोगका अनुसार १३२ र ६६ के.भी.बाट टाइन अफ डे मिटरबाट विद्युत खपत गर्ने व्यवसायिक ग्राहक छैनन् ।
व्यापारिक ग्राहकलाई भार
मझ्यौला भोल्टेज (३३ के.भी.)बाट विद्युत खपत गर्नेमा भने औद्योगिक र व्यापारिक दूबै ग्राहक छन् । ३३ के.भी.बाट लाइन लिएका औद्योगिक ग्राहकले डिमाण्ड चार्जबापत प्रति के.भी.ए. प्रति महिना २५० रुपैयाँ बुझाउनुपर्छ भने व्यापारिक ग्राहकले प्रति के.भी.ए. प्रति महिना ३१५ रुपैयाँ बुझाउनुपर्छ । अब एसेम्बल प्लान्टहरु औद्योगिक ग्राहकबाट व्यापारिक ग्राहक हुनासाथ डिमाण्ड चार्जबापत अहिलेको भन्दा प्रति के.भी.ए. प्रति महिना ६५ रुपैयाँ बढी तिर्नुपर्ने देखिन्छ ।
इनर्जी शुल्कतर्फ औद्योगिक ग्राहकले साँझ ५ बजेदेखि राती ११ बजेसम्म प्रतियुनिट १०.२० रुपैयाँ र व्यापारिक ग्राहकले प्रतियुनिट १२.३० रुपैयाँ तिर्नुपर्छ । यस आधारमा अब एसेम्बल उद्योगले पिक आवरमा यस अघिको भन्दा प्रति युनिट २.१० रुपैयाँ बढी तिर्नुपर्ने देखिन्छ ।
राती ११ देखि बिहान ५ बजेसम्म औद्योगिक ग्राहकले ५.२५ रुपैयाँ प्रतियुनिट महशुल तिर्दा हुन्छ भने व्यापारिक ग्राहकले ६.७५ रुपैयाँ तिर्नुपछ । यो प्रावधानअनुसार अब एसेम्बल प्लान्टहरुले राती ११ देखि बिहान ५ बजेसम्म यस अघिको भन्दा प्रतियुनिट १.५० रुपैयाँ बढी तिर्नुपर्ने भएको छ ।
बिहान ५ देखि साँझ ५ बजेसम्म औद्योगिक ग्राहकले प्रतियुनिट ८.४० रुपैयाँ र व्यापारिक ग्राहकले प्रतियुनिट १०.८० रुपैयाँ तिर्नुपर्छ । यसअनुसार अब एसेम्बल उद्योगहरुले यो समयमा पनि २.४० रुपैयाँ बढी महशुल बुझाउनुपर्ने अवस्था रहन्छ ।
यो भनेको बैशाखदेखि मंसिर सम्मको दर हो ।
पौषदेखि चैतसम्म भने दिनको दुइ थरी मात्रै महशुल दर छ । साँझ ५ बजेखि राती ११ बजेसम्म र राती ११ बजेदेखि भोलिपल्ट साँझ ५ बजेसम्म गरी दुइ थरी महशुल दर तोकिएको छ । जस अनुसार ३३ के.भी. लाइनका औद्योगिक ग्राहकले पौषदेखि चैतसम्म साँझ ५ बजेदेखि राती ११ बजेसम्म प्रतियुनिट १०.२० रुपैयाँ र व्यापारिक ग्राहकले प्रतियुनिट १२.३० रुपैयाँ महशुल तिर्नुपर्छ । यो दर अनुसार एसेम्बल प्लान्टलाई विद्युत प्राधिकरणले व्यवसायिक ग्राहकमा रुपान्तरण गरेपछि प्रतियुनिट २.१० रुपैयाँ बढी तिर्नुपर्छ ।
राती ११ देखि भोलिपल्ट साँझ ५ बजेसम्म औद्योगिक ग्राहकले प्रतियुनिट ८.४० रुपैयाँ र व्यापारिक ग्राहकले प्रतियुनिट १०.८० रुपैयाँ तिर्नुपर्छ । यस हिसाब अनुसार अब एसेम्बल प्लान्ट यसअघिको तुलनामा एक युनिट बराबर नै २.४० रुपैयाँ बढी तिर्नुपर्ने देखिन्छ ।
यस आधारमा अब एसेम्बल प्लान्टलाई प्राधिकरणले औद्योगिक ग्राहकको सूचीबाट हटाएर व्यवसायिक ग्राहकमा राखेपछि प्रति युनिट विद्युत महशुल नै अहिलेको तुलनामा ६ रुपैयाँ बढी तिर्नुपर्ने देखिन्छ । पिक आवरको प्रतियुनिट २.१० रुपैयाँ, अन पिक आवरको एक युनिट बराबर १.५० रुपैयाँ र अन्य समयको प्रतियुनिट २.४० रुपैयाँ बढी महशुल तिर्नुपर्ने देखिएको हो । योसँगै हरेक महिना प्रति के.भी.ए. प्रति महिनाका दरले बुझाउनुपर्ने डिमाण्ड चार्जमा पनि एक के.भी.ए.मा ६५ रुपैयाँ थप हुनेछ ।
उद्योगीहरुका अनुसार यसको असर गाडी तथा बाइकको मूल्यमा पर्ने देखिन्छ ।
यस अघि : फेरि उद्योगी तर्साउँदै कुलमान: ‘उद्योग होइनौ’ भन्दै एसेम्बल कम्पनीसँग मागे ‘ब्याक डेट’को पैसा
