रसुवागढी हाइड्रोपावर कम्पनी लिमिटेडले हिजो बुधबार भोटेकोशी नदीमा आएको भीषण बाढीको कारण आयोजनामा ठूलो क्षति भएको जनाएको छ । कम्पनीद्धारा रसुवा जिल्लाको गोसाइकुण्ड गाउँपालिका वडा नं. १ र २ को सिमानामा निर्माण सम्पन्न १११ मेगावाट क्षमताको रसुवागढी जलविद्युत आयोजनामा बाढीले ठूलो क्षति पुर्याएको हो ।
कम्पनीका अनुसार बुधबार विहान आयोजनाको श्रोत नदी भोटेकोशीमा आएको ठूलो बाढीका कारण आयोजनाको बाँधस्थल, आवासगृह तथा जलविद्युत केन्द्रका अधिकांश संरचनाहरुमा ठूलो क्षति पुगेको प्रारम्भिक जानकारी प्राप्त भएको छ । जलविद्युत केन्द्रमा हाल कार्यरत अधिकांश कर्मचारीहरुको अवस्था समेत अज्ञात रहेको कम्पनीले जनाएको छ।
उक्त काबु बाहिरको अकल्पनिय परिस्थितिका कारण हालका लागि जलविद्युत केन्द्रबाट विद्युत उत्पादन बन्द हुनपुगेको कम्पनीले उल्लेख गरेको छ ।
