प्रधानमन्त्री केपी शर्मा ओलीले शुक्रबार नै विद्युत लाइन काटिएका उद्योगमा लाइन जोड्न निर्देशन दिएपनि नेपाल विद्युत प्राधिकरणले अझै लाइन जोडेको छैन ।
शुक्रबार प्रधानमन्त्री ओलीले निर्देशन दिएपछि ऊर्जा, जलस्रोत तथा सिंचाई मन्त्रालयमा प्राधिकरणको सञ्चालक समितिको बैठक बसेको थियो । तर, बैठकबाट लाइन जोड्ने सम्बन्धि कुनैपनि निर्णय भएन ।
प्राधिकरणका प्रबन्ध निर्देशक कुलमान घिसिङले नै लाइन जोड्न ऊर्जा मन्त्रालयबाट निर्देशन आउनुपर्ने वा बैठक बस्नु अगाडी नै एजेण्डा सञ्चालक समितिका सदस्यहरुलाई उपलब्ध गराउनुपर्ने भएकाले लाइन जोड्ने सम्बन्धि निर्णय गर्न नसकिने अडान लिएको स्रोतले बताएको छ ।
प्रधानमन्त्री तथा मन्त्रिपरिषद कार्यालयले लिखित निर्देशन नदिएसम्म लाइन जोड्न नसकिने कुलमानको अडान छ ।
शुक्रबार प्रधानमन्त्री ओलीले विद्युत प्राधिकरणका प्रबन्ध निर्देशन घिसिङलाई लाइन काटिएका उद्योगमा तत्काल बिजुली जोड्न निर्देशन दिएका थिए । प्राधिकरणले हालसम्म ६ वटा उद्योगको लाइन काटेको छ ।
