ऊर्जामन्त्री कुलमान घिसिङले वर्षायाम सुरु हुनुभन्दा अगाडि नै काठमाडौँ भित्रको विद्युतीय तार भूमिगत गरिसक्न दिर्नेशन दिएका छन् । मन्त्री घिसिङले प्राधिकरणका कार्यकारी निर्देशक, आयोजना प्रमुख, काठमाडौँ महानगरपालिका प्रतिनिधि र निर्माण व्यवसायीसँग छलफल गर्दै वर्षा सुरु हुनुभन्दा अगाडि नै तार भूमिगतको काम सक्न निर्देशन दिएका हुन् ।
छलफल पश्चात विद्युतीय तार भूमिगत गर्ने क्रममा फिल्डमा देखिएका समस्या समाधानका लागि समन्वय गर्ने जिम्मेवारी प्राधिकरणका निर्देशक र महानगरपालिका सार्वजनिक निर्माण विभागका प्रमुखलाई दिइएको छ ।
छलफलमा मन्त्री घिसिङले विद्युतीय तार भूमिगत गर्ने काम सम्पन्न भएका स्थानमा इन्टरनेट, टेलिफोन र टेलिभिजन सेवा प्रदायकसँग समन्वय गरी ओभरहेड (जमिनमाथि) तारसमेत हटाउने काम सुरु गर्न भनेका छन् ।
प्राधिकरणले पहिलो चरणमा रत्नपार्क र महाराजगञ्ज वितरण केन्द्रअन्तर्गतका क्षेत्रमा काम गरेको थियो । दोस्रो चरणमा काठमाडौंको बाँकी स्थान, तेस्रो चरणमा ललितपुर तथा भक्तपुरको सहरी क्षेत्रमा काम थालेको थियो । चौथो चरणमा पोखरा तथा भरतपुर महानगरपालिका भित्रको वितरण प्रणालीलाई भूमिगत गर्ने काम समेत सुरु भइसकेको प्राधिकरणले जनाएको छ । प्राधिकरणका अनुसार काठमाडौं उपत्कायभित्र करिब ८० प्रतिशत काम सकिएको छ ।
