नेपाली युवा उद्यमी मञ्च (एनवाईईएफ) काठमाडौं च्याप्टरको आठौं वार्षिक साधारणसभाबाट अनुभव श्रेष्ठलाई अध्यक्षमा निर्वाचित गरेको छ । साधारणसभाले श्रेष्ठको अध्यक्षमा नयाँ कार्यकारिणी समिति चयन गरेको हो ।
पदभार ग्रहणपछि नवनिर्वाचित अध्यक्ष अनुभव श्रेष्ठले विश्वास, सहकार्य, निरन्तर सिकाइ र साझा उद्देश्यमा आधारित सशक्त तथा एकतावद्ध एनवाईईएफ काठमाडौं निर्माण गर्ने आफ्नो प्रतिवद्धता व्यक्त गरेका छन् । उनले एनवाईईएफलाई केवल व्यवसायिक सञ्जालमा सीमित नराखी युवा उद्यमीहरूले मार्गदर्शन, सहकार्य, अवसर तथा अपनत्व महसुस गर्ने साझा मञ्चका रूपमा अझ सशक्त बनाउने लक्ष्य रहेको बताएका छन् ।
एनवाईईएफले आफ्नो व्यक्तिगत तथा व्यवसायिक यात्रामा महत्वपूर्ण भूमिका खेलेको उल्लेख गर्दै अध्यक्ष श्रेष्ठले अब यस संस्थालाई नेपालको युवा उद्यमशीलताको भविष्य निर्माण गर्ने अग्रणी संस्थाका रूपमा स्थापित गर्ने प्रतिवद्धता व्यक्त गरेका छन् । उनले उद्यमशीलता केवल व्यवसाय सञ्चालन गर्ने माध्यम मात्र नभई रोजगारी सिर्जना, नवप्रवर्तन प्रवर्द्धन, सामाजिक समस्या समाधान तथा नेपालको दीर्घकालीन आर्थिक समृद्धिको प्रमुख आधार भएको उल्लेख गरेका छन् ।
विगत केही वर्षमा व्यवसायिक क्षेत्रमा देखिएका चुनौतीहरूको चर्चा गर्दै उनले नेपाली उद्यमीहरूले कठिन परिस्थितिमा पनि देखाएको धैर्यता र दृढताको प्रशंसा गरेका छन् । आर्थिक संक्रमणका बेला नै नयाँ सोच, नवप्रवर्तन र दूरदर्शी नेतृत्वको आवश्यकता अझ बढी हुने उल्लेख गर्दै उनले युवा उद्यमीहरूलाई परिवर्तनका संवाहक, नवप्रवर्तक तथा नेतृत्वदायी भूमिकामा अगाडि बढ्न आग्रह गरे । साथै, एनवाईईएफ काठमाडौंलाई ज्ञान आदान–प्रदान, मार्गदर्शन, जिम्मेवार व्यवसायिक नेतृत्व तथा साझा सफलताको संस्कृतिमा आधारित संस्थाका रूपमा विकास गर्दै राष्ट्रिय तथा अन्तर्राष्ट्रिय साझेदारीलाई थप सुदृढ बनाउने आफ्नो योजना पनि प्रस्तुत गरेका छन् ।
कार्यक्रमका प्रमुख अतिथि, प्रतिनिधि सभा सदस्य गणेश पराजुलीले नवनिर्वाचित अध्यक्ष अनुभव श्रेष्ठ तथा सम्पूर्ण कार्यसमितिलाई हार्दिक बधाई तथा सफल कार्यकालको शुभकामना व्यक्त गरेका थिए । उनले नवप्रवर्तन, रोजगारी सिर्जना तथा निजी क्षेत्रको विस्तारमार्फत नेपालको आर्थिक रूपान्तरणमा युवा उद्यमीहरूको भूमिका अत्यन्त महत्वपूर्ण रहेको उल्लेख गरे । नेपालको जनसांख्यिक लाभलाई आर्थिक समृद्धिमा रूपान्तरण गर्न युवाहरूलाई उद्यमशीलता, नवप्रवर्तन र रोजगारी सिर्जनामा अग्रसर बनाउन आवश्यक रहेको उनको भनाइ छ । युवा उद्यमीमैत्री वातावरण निर्माणका लागि नीति निर्माता र निजी क्षेत्रबीच निरन्तर सहकार्य अपरिहार्य रहेको पनि उनको धारणा छ ।
कार्यक्रमका विशिष्ट अतिथि नेपाल उद्योग वाणिज्य महासंघका अध्यक्ष अञ्जन श्रेष्ठले नेपालको आर्थिक भविष्य निर्माणमा युवा उद्यमीहरूको असाधारण सम्भावना रहेको उल्लेख गरे । उनले नेपाली युवामा रहेको सिर्जनशीलता, प्रविधिमैत्री सोच, विश्वव्यापी दृष्टिकोण तथा जोखिम उठाउने क्षमता नेपालको आर्थिक रूपान्तरणका लागि महत्वपूर्ण पूँजी भएको बताए । एनवाईईएफजस्ता संस्थाले भावी व्यवसायिक नेतृत्व विकास, उद्यमशील सोचको विस्तार, नवप्रवर्तन प्रवर्द्धन तथा स्टार्टअप इकोसिस्टम सुदृढीकरणमा महत्वपूर्ण भूमिका निर्वाह गरिरहेको उल्लेख गर्दै महासंघले युवा उद्यमशीलता प्रवर्द्धन, नवप्रवर्तन, वित्तीय पहुँच, मार्गदर्शन तथा व्यवसायिक सञ्जाल विस्तारका क्षेत्रमा एनवाईईएफसँग सहकार्यलाई अझ सुदृढ बनाउँदै लैजाने प्रतिवद्धता जनाए ।
साधारणसभाबाट श्रेष्ठको अध्यक्षतामा आप्पा शेर्पा निवर्तमान अध्यक्षका रुपमा कार्यकारिणी समितिमै रहने छन् भने प्रथम उपाध्यक्षमा सन्दीप शर्मा, द्वितीय उपाध्यक्षमा सौरभ श्रेष्ठ चुनिए ।
कार्यकारिणी समितिमा सायन प्रजापति, सन्तोष पाण्डे, आश्लेषा कार्की, छेची शेर्पा, सुरक्षा अधिकारी, इच्छा मल्ल, अमृताञ्जली शाक्य, निखिल अग्रवाल, श्रेया गिरी, श्यारोन अधिकारी र प्रियान्शी जालान चुनिएका छन् ।
