नेपाल स्टक एक्सचेन्ज नेप्सेमा सुचिकृत भएका हाइड्रोपावर कम्पनीहरु मध्ये थोरै कम्पनीले मात्र लाभांश दिने गरेका छन्। ति मध्ये पनि नियमित लाभांश दिने हाइड्रोपावर कम्पनी निकै न्यून छन् । एकाधले मात्र नियमित र दोहोरो अंकको लाभांश दिएका छन् ।
ति एकाथ कम्पनी मध्येका हुन् माउन्टेन इनर्जी नेपाल र रुरु जलविद्युत। पछिल्लो चार वटा आर्थिक वर्षमा लगातार दोहोरो अंकको लाभांश दिने हाइड्रो कम्पनी यी दुई वटा मात्र हुन् । यी दुई मध्ये पनि लाभांश दर तुलना गर्दा रुरु भन्दा माउन्टेन अब्बल देखिएको छ ।
यसको लागि आर्थिक वर्ष २०७८/७९ देखि आर्थिक वर्ष २०८१/८२ सम्ममा हालसम्म दोहोरो अंकको लाभांश दिएका हाइड्रो कम्पनीको लाभांश दर विश्लेषण गरिएको छ। आर्थिक वर्ष २०७८/७९ मा रिडी हाइड्रो, कालिका पावर, चिलिमे हाइड्रो, बुटवल पावर, अरुण काबेली पावर, रुरु जलविद्युत, माउन्टेन इनर्जी, युनाइटेड इदी मार्दी र सिक्लेस हाइड्रोले मात्र दोहोरो अंकको लाभांश दिएका थिए।
आर्थिक वर्ष २०७९/८० मा माउन्टेन इनर्जी, चिलिमे हाइड्रो, सानिमा माई हाइड्रो, भगवती हाइड्रो, रुरु जलविद्युत, कालिका पावर, र मान्डु हाइड्रोले दोहोरो अंकको लाभांश दिएका थिए।
आर्थिक वर्ष २०८०/८१ मा कुथेली बुखरी हाइड्रो, ग्रिन भेन्चर्स, सानिमा माई हाइड्रो, चिलिमे हाइड्रो, मान्डु हाइड्रो, सुपर माई हाइड्रो, भगवती हाइड्रो, रुरु हाइड्रो र माउन्टेन इनर्जीले दोहोरो अंकको लाभांश दिएका थिए।
आर्थिक वर्ष २०८१/८२ मा हालसम्म लाभांश घोषणा गरेका मध्ये दोहोरो अंकको लाभांश घोषणा गर्नेमा मिड सोलु, सिक्लेस हाइड्रो, भगवती हाइड्रो, माउन्टेन इनर्जी र साहस उर्जा रहेका छन् ।
यस हिसाबमा हेर्दा रुरु हाइड्रो र माउन्टेन इनर्जीले मात्र आर्थिक वर्ष २०७८/७९ देखि आर्थिक वर्ष २०८०/८१ मा सम्म लगातार दोहोरो अंकको लाभांश दिएका छन् । माउन्टेन इनर्जीले आर्थिक वर्ष २०८१/८२ को लाभांश घोषणा गरिसकेको भएपनि रुरुले आर्थिक वर्ष २०८१/८२ को लाभांश घोषणा गर्न बाँकि छ । यसो हुँदा रुरु हाइड्रो र माउन्टेन इनर्जीले आर्थिक वर्ष २०७८/७९ देखि आर्थिक वर्ष २०८०/८१ मा दिएको लाभांश तुलना गर्नु पर्ने हुन्छ ।
रुरु हाइड्रोले यी आर्थिक वर्षमा क्रमश १०.५२६३ प्रतिशत, १०.५२६३ प्रतिशत र १५.७८९ प्रतिशत लाभांश दिएको थियो। जुन कुल ३६.८४१ प्रतिशत हुन आउंछ ।
माउन्टेन इनर्जीले भने यी आर्थिक वर्षमा क्रमश १०.५२६३ प्रतिशत, १५.७८९५ प्रतिशत र १५.७८९५ प्रतिशत लाभांश दिएको थियो। जुन कुल ४२.१०५३ हुन आउंछ । यस हिसाबमा आर्थिक वर्ष २०७८/७९ देखि आर्थिक वर्ष २०८०/८१ सम्मको लाभांश तुलना गर्दा रुरुको तुलनामा माउन्टेन अब्बल देखिएको हो ।
यदि आर्थिक वर्ष २०८१/८२ को लागि रुरुले २४.३१७ प्रतिशत लाभांश दिएमा पछिल्ला ४ आर्थिक वर्षलाई तुलना गर्दा रुरुले माउन्टेनलाई उछिन्ने छ।
