नेपाल चेम्बर अफ कमर्सका निवर्तमान अध्यक्ष राजेन्द्र मल्लले शंकरापूरको भाग्योदय क्याम्पसका विद्यार्थीलाई छात्रवृत्ति प्रदान गरेका छन् । उनले आफ्नी स्वर्गीय माता दिलमाया मल्लको नाममा उक्त क्याम्पसमा अध्ययनरत विद्यार्थीहरुलाई छात्रवृत्ति प्रदान गरेका हुन् ।
नेपाल निर्जीवन बीमा व्यवसायी संघका अध्यक्षसमेत रहेका मल्लले आफ्नो नामबाट पनि हरेक वर्ष उक्त क्याम्पसका विद्यार्थीलाई छात्रवृत्ति प्रदान गर्दै आएका छन् । स्नातक तहमा अध्ययन गर्ने बीबीए र बीएड् शंकायका उच्च अंक प्राप्त गर्ने जेहेन्दार विद्यार्थीहरुलाई आफूले विगतदेखि नै छात्रवृत्ति प्रदान गर्दै आएको र यो आगामी वर्षहरुमा पनि कायम रहने उनको भनाइ छ ।
२००७ सालमा स्थापना भएको उक्त विद्यालयमा २०५९ सालमा क्याम्पस स्थापना गरिएको थियो । क्याम्सप स्थापनाको अगुवाई पनि मल्ल नै गरेका थिए । उनी उक्त विद्यालयका पूर्व विद्यार्थीसमेत हुन् । क्याम्सप स्थापनाका लागि सम्बन्धन लिन तत्कालिन समयमा विश्वविद्यालयलाई बुझाउनुपर्ने ५५ हजार रुपैयाँ पनि मल्लले नै चन्दा स्वरुप दिएका थिए ।
उक्त क्याम्पसको संस्थापक सदस्यसमेत रहेका मल्लले त्यसपछि ८ वर्ष सो क्याम्पसको अध्यक्ष भएर सेवा गरेका थिए । क्याम्पस सञ्चालनका लागि आवश्यक भौतिक संरचना र भवन निर्माणका लागिसमेत चन्दा दिने र चन्दा संकलन गर्ने कामको अगुवाई गरेका मल्लले अहिले उक्त क्याम्पसमा आईटी विषयको पढाइसमेत राख्नका लागि पहल गरिरहेका छन् ।
‘हामीले त्यतिबेला अगुवाई गरेर, चन्दा उठाएर खोलेको क्याम्पस अहिले शंकरापूर क्षेत्रकै नमूना क्याम्पस बनेको छ, त्यहाँ अब आईटीको पनि छुट्टै क्लास राख्नका लागि पहल भइरहेको छ’ मल्लले भने ।
शंकरापूर क्षेत्रको नमूना क्याम्पसका रुपमा स्थापित भाग्योदय क्याम्पस काठमाडौँको गौशालाबाट जम्मा १५ किलोमिटरको दूरीमा अवस्थित छ ।
