भैरहवास्थित गौतमबुद्ध अन्तर्राष्ट्रिय विमानस्थलबाट ४ एयरलाइन्सले नियमित उडान सुरु गरेका छन् । विमानस्थल उद्घाटन भएको साढे २ वर्षपछि नेपाल एयरलाइन्स, थाइ एयर एशिया, जजीरा एयरवेज र फ्लाई दुबईले उडान गर्ने भएपछि त्यस क्षेत्रका व्यवसायीहरु आशावादी भएका छन् ।
अन्तर्राष्ट्रिय विमानस्थल सञ्चालनमा आउने आशाले अर्बौ रुपैयाँ लगानी गरेका होटल तथा पर्यटन व्यवसायीहरु विमानस्थल सञ्चालन नहुँदा निराश थिए । तर, २०७९ जेठ २ गते उद्घाटन भएको विमानस्थलबाट नेपाल एयरलाइन्स, थाइ एयर एशिया, जजीरा एयर र फ्लाई दुबईले उडान गर्ने निश्चित भएसँगै आफूहरुमा आशा पलाएको व्यवसायीहरुले बताएका छन् ।
थाई एयर एशिया कार्तिक २३ गतेबाट उक्त विमानस्थलबाट व्यवसायिक उडान सुरु गरिसकेको छ । यस कम्पनीले अब साताको दुई उडान नियमित गर्नेछ ।
शनिबार आज बिहानबाट जजीरा एयरले पनि उडान सुरु गरेको छ । शनिबार बिहान ७ः३० बजे कुवेतबाट आएको जजीरा एयरवेजको जहाज ८ः३० बजे फर्केको छ । जजीराले साताको तीन दिन भैरहवाबाट उडान गर्नेछ ।
शनिबार दिउँसो १२ बजे फ्लाइ दुबईको जहाज आउने छ । फ्लाई दुबईले हप्तामा सातै दिन उडान गर्नेछ ।
नेपाल एयरलाइन्सले पनि आजै भैरहवाबाट उडान गर्नेछ । यद्यपीी, नेपाल एयरलाइन्सको नियमित उडान तालिका भने आइसकेको छैन ।
३५ अर्ब ६६ करोड लगानीमा निर्माण भएको भैरहवा विमानस्थललाई हेरेर त्यस क्षेत्रमा व्यवसायीहरुले करिब ८० अर्ब रुपैयाँ लगानी गरेका छन् । सिद्धार्थ उद्योग वाणिज्य संघका अध्यक्ष ठाकुरकुमार श्रेष्ठले अझैपनि विमानस्थल नियमित सञ्चालन हुन्छ भन्नेमा ढुक्क भएर बस्न सकिने अवस्था नरहेको बताए । यसअघि जजीरा र हिमालयन एयरलाइन्सले भैरहवाबाट केही समय उडान गरेपनि यात्रु अभाव र अन्य कारण देखाउँदै उडान बन्द गरेको घटना धेरै पूरानो नरहेकाले अब पनि ढुक्क हुने अवस्था नरहेको तर विमानस्थल सञ्चालन गर्नुको विकल्प नभएको उनको भनाइ छ ।
उक्त विमानस्थलमा दैनिक ४० वटासम्म अन्तराष्ट्रिय उडान धान्ने क्षमता छ ।
