सिचुआन एयरलाइन्सको जहाज चीनको कुन्मिङबाट बिहीबार पोखरा अन्तर्राष्ट्रिय विमानस्थलमा आउने भएको छ । सिचुआन एयरलाइन्सको जहाज बिहिबार दिउँसो २ः४० बजे पोखरा अन्तर्राष्ट्रिय विमानस्थलमा अवतरण गर्ने जनाइएको छ ।
पोखरामा हुन लागेको तेस्रो पोखरा अन्तर्राष्ट्रिय क्रसकन्ट्री दौडका सहभागीसहित कुन्मिङ नगरका अतिथिलाई लिएर सिचुआन एयरलाइन्सको जहाज चीनको कुन्मिङबाट सिँधै पोखरा आउन लागेको हो ।
यसअघि सिचुआन एयरले नै २०२३ जनवरी २१ मा पोखराका लागि पहिलो उडान गरेको थियो । पोखरा अन्तर्राष्ट्रिय विमानस्थलमा यात्रुसहित अवतरण गरेको सिचुआन एयरलाइन्सको जहाज नै पहिलो जहाज हो । त्यतिबेला फेवातालमा आयोजित ड्रागन बोटरेस फेस्टिभलमा सहभागी ८४ चिनियाँ नागरिकलाई लिएर सिचुआनको जहाज पोखरा अवतरण गरेको थियो ।
अंग्रेजी नयाँ वर्ष २०२३ को पहिलो दिन पोखरा अन्तर्राष्ट्रिय विमानस्थल उद्घाटन गरिएको थियो । तर, उक्त वर्ष भरीमा जम्मा ७ वटा मात्र उडान भएका थिए । हालसम्म नियमित अन्तर्राष्ट्रिय उडान हुन नसकेको पोखरा अन्तर्राष्ट्रिय विमानस्थल चिनियाँ ऋण सहयोगमा निर्माण भएको हो ।
सन् २०२३ सेप्टेम्बर ९ मा भुटानको पारो अन्तर्राष्ट्रिय विमानस्थलबाट ३ जना यात्रु लिएर आएको ड्रुक एयरले फर्किदा ४२ विदेशी यात्रु लिएर गएको थियो । सोही वर्षको नोभेम्बर २३ मा हिमालयन एयरलाइन्सको जहाजले चीनबाट ९५ जना यात्रु पोखरा ल्याएको थियो । त्यसयता उक्त विमानस्थलमा अन्तर्राष्ट्रिय उडान भएका छैनन् ।
यस पटक आउन लागेको सिचुआन एयरको जहाज बिहिबार दिउँसो २ः४० मा अवतरण गरेर दिउँसो ४ः१० मा रित्तै फर्किने जनाइएको छ ।
