थाइ एयर एशियाले भैरहवास्थित गौतमबुद्ध अन्तर्राष्ट्रिय विमानस्थलबाट भैरहवा–बैंकक उडान सुरु गरेको छ । थाइ एयर एशियाले भैरहवाबाट सातामा दुई पटक उडान गर्नेछ ।
गौतमबुद्ध अन्तर्राष्ट्रिय विमानस्थलमा आइतबार बिहान ७ बजे अवतरण गरेको थाइ एयर एशियालको जहाज बिहान ७ः४० बजे बैंकक प्रस्थान गरेको थियो । जहाजमा चालक दलका ७ सदस्य मात्रै आएका थिए ।
गौतमबुद्ध अन्तर्राष्ट्रिय विमानस्थलका प्रवक्ता विनोद राउतका अनुसार यो एयरलाइन्सले अब अर्को उडान ८ नोभम्बरमा गर्नेछ ।
थाइ एअर एसियाले काठमाडौँसहित भैरहवाबाट उडान गर्न केही समय अघि मात्रै नियामक निकाय नेपाल नागरिक उड्डययन प्राधिकरणबाट अनुमति पाएको थियो । भैरहवाबाट बैंककतर्फ एकतर्फी सुरुवाती भाडादर १२ हजार रुपैयाँ तोकिएको छ ।
नोभेम्बर ९ बाट जजीरा एअरले पनि साताको २ दिन भैरहवा–कुवेत उडान गर्ने तयारी गरेको छ ।
