काठमाडौँबाट भारतको राजधानी नयाँ दिल्ली उड्न लागेको एयर इन्डियाको जहाजमा बम राखिएको सूचना आएको छ ।
सोमबार अपराह्न दिल्ली उड्न तयार भएको जहाजमा बम राखिएको सूचना आएपछि अहिले चेकजाँच चलिरहेको नागरिक उड्डयन प्राधिकरणका सूचना अधिकारी ज्ञानेन्द्र भूलले जानकारी दिएका छन् ।
‘अपराह्न ३ः१२ बजे एयर इन्डियाको जहाज अवतरण गरेको थियो, जहाज अवतरण भएपछि फर्किनका लागि १६९ यात्रुमध्ये ४० जना यात्रु चढिसकेपछि एयर इन्डियाको सेक्युरिटी म्यानेजरलाई इन्डियाबाट अपरेशन कन्ट्रोल एन्ड कमान्ड सेन्टरबाट बम छ भनेर कल आएको हो,’ उनले भने, ‘अहिले जहाजमा चढिसकेका ४० जना यात्रुलाई उतारेर चेकजाँच भइरहेको छ ।’
नेपाली सेना र नेपाल प्रहरीको संयुक्त टोलीले जहाजको चेक जाँच गरिरहेका छन् । उक्त जहाज आज अपराह्न ३ः५० बजे उड्ने तयारी थियो ।
यसअघि कात्तिक ६ गते दिल्लीबाट काठमाडौँका लागि उडेको भिस्तारा एयरलाइन्समा बम राखिएको सूचना आएको थियो । तर, साढे तीन घण्टा चेकजाँच गरेपछि सूचना गलत रहेको पुष्टि भएको थियो ।
