खुम्बु क्षेत्रको खराब मौसमका कारण दुई दिनदेखि रामेछाप (मन्थली)–लुक्ला उडान ठप्प भएको छ । सोलुखुम्बुको खुम्बु क्षेत्रमा मौसम खराब भएपछि सोमबारदेखि मन्थली–लुक्ला उडान ठप्प भएको हो ।
उडान रोकिँदा सगरमाथा क्षेत्रको भ्रमणका लागि आएका पर्यटकहरु मन्थलीमै रोकिएका छन् ।
गत शनिबारबाट मौसम खुलेपछि सुरु भएको उडान फेरी मौसम बिग्रिएपछि सोमबारबाट रोकिएको नागरिक उड्डयन कार्यालय रामेछाप मन्थलीका उप–प्रबन्धक हिरण्य साहले जानकारी दिए । उनका अनुसार खुम्बु क्षेत्रमा मौसम बिग्रिँदा सोमबारदेखि मन्थली–लुक्ला उडान हुन सकेको छैन । मन्थली–काठमाडौँ भने तालिका अनुसार नै उडान भइरहेको उनको भनाइ छ ।
सरकारले सगरमाथा क्षेत्र भ्रमणमा आएका विदेशी पर्यटकलाई रामेछापको मन्थली विमानस्थलबाट लुक्ला पुर्याउने र ल्याउने व्यवस्था गरेको छ । नागरिक उड्डयन प्राधिकरणले वसन्त ऋतु (चैतदेखि जेठ महिना) र शरद ऋतु (असोज पहिलो सातादेखि मङ्सिरको १५ सम्म)मा मन्थली विमानस्थलबाट लुक्ला पर्यटक लैजाने र ल्याउने गरि उडान तालिका बनाएको छ ।
यो वर्षको शरद ऋतुको सिजन सुरु भएपछि पटक पटक मौसम बिग्रिँदा सगरमाथा क्षेत्र भ्रमणका लागि आएका पर्यटकहरू मन्थलीमै रोकिनु परेको छ । जसका कारण उनीहरुलाई समस्या भएको छ ।
यसअघि असोज १० देखि १२ गतेसम्म परेको अविरल वर्षा र त्यसपछि पटक पटक मौसममा आएको खराबीले सगरमाथा क्षेत्र घुम्न आएका पर्यटक प्रभावित भएका छन् । मौसम खराबीकै कारण असोज २३ गतेदेखि तीन दिनसम्म मन्थली–लुक्ला उडान ठप्प भएको थियो ।
मन्थलीबाट सीता, तारा र समिट एयरका जहाजहरूले सगरमाथा क्षेत्रको भ्रमणमा आएका विदेशी पर्यटकलाई लुक्ला पुर्याउने र ल्याउने गरिरहेका छन् । एउटा उडानमार्फत १४ देखि १८ जनासम्म पर्यटक मन्थली विमानस्थलबाट लुक्ला पुग्ने गरेका छन् । बिहानदेखि बेलुकासम्म मौसम खुलेको समयमा एक दिनमा यो रुटमा ६० वटासम्म उडान हुने गरेको नागरिक उड्डयन प्राधिकरण मन्थलीका उप–प्रबन्धक साहले बताए ।
