भैरहवास्थित गौतमबुद्ध अन्तर्राष्ट्रिय विमानस्थलमा ३ अन्तर्राष्ट्रिय एयरलाइन्स कम्पनीले उडान सञ्चालन गर्ने भएका छन् । यसअघि जजीरा एयरले केही समय उडान गरेको भएपनि प्राविधिक कारण देखाउँदै उडान रोकेकोमा अब भने ३ अन्तर्राष्ट्रिय एयरलइन्सले व्यावसायिक उडान सञ्चालन गर्ने भएका हुन् । ३ मध्ये २ वटा एयरलाइन्सको उडान पक्का भइसकेको छ भने एउटाको बाँकी छ ।
गौतमबुद्ध अन्तर्राष्ट्रिय विमानस्थलका महाप्रबन्धक प्रतापबाबु तिवारीका अनुसार कुवेतको जजीरा, दुवईको राष्ट्रिय ध्वजावाहक फ्लाई दुबई र थाइ एयर एशियाले गौतमबुद्ध विमानस्थलमा उडान गर्न लागेका हुन् । यी तीन वटै एयरलाइन्सले नेपाल नागरिक उड्डयन प्राधिकरणबाट उडान अनुमति लिइसकेका छन् ।
फ्लाई दुवईले आगामी कात्तिक २४ गतेदेखि गौतमबुद्ध अन्तर्राष्ट्रिय विमानस्थलमा नियमित उडान सुरु गर्नेछ । हप्ताको सातै दिन फलाई दुबईले दुबई–भैरहवा र भैरहवा–काठमाडौँ–दुबई उडान गर्न लागेको हो ।
महाप्रबन्धक तिवारिका अनुसार फलाई दुबईको विमान दुबईबाट दिउँसो १ः४५ बजे भैरहवा आएर ३ः३० बजे काठमाडौँस्थित त्रिभुवन अन्तर्राष्ट्रिय विमानस्थल हुँदै दुबई जाने उडान तालिका छ ।
यस्तै जजीरा एयरले कात्तिक १२ गतेदेखि पुनः उडान सञ्चालन गर्दैछ । यसअघि १० महिना उडान गरेर उडान स्थगित गरेको जजीरा एयरलाइन्सले पुनः सोही विमानस्थलमा उडान सुरु गर्न लागेको हो । जजिराले सातामा तीन दिन मङ्गलबार, बिहीबार र शनिबार उडान भर्नेछ ।
जजीराको विमान बिहान ७ः३० बजे भैरहवा आएर ८ः३० बजे कुवेत फर्किनेछ । यसअघि २०७९ जेठ २ गते गौतमबुद्ध अन्तर्राष्ट्रिय विमानस्थलको उद्घाटन भएसँगै जजीराले भैरहवामा उडान थालेको थियो । तर, पछि प्राविधिक कारण देखाउँदै उसले भैरहवामा उडान रोकेको थियो ।
थाई एयर एसियाले पनि चाँडै गौतमबुद्ध विमानस्थलमा उडान गर्ने योजना बनाएको छ । तर, यो एयरलाइन्सले कहिलेबाट उडान सुरु गर्ने भन्ने टुङ्गो लाग्न भने बाँकी छ ।
महाप्रबन्धक तिवारीका अनुसार भैरहवा विमानस्थलमा अन्तर्राष्ट्रिय उडान सञ्चालनका लागि आवश्यक पर्ने अध्यागमन, भन्सार, सुरक्षालगायतका व्यवस्थापकीय काम दुरुस्त अवस्थामा राखिएको छ ।
यो विमानस्थलबाट अन्य एयरलाइन्सले पनि उडानका लागि चासो देखाएका छन् ।
संस्कृति, पर्यटन तथा नागरिक उड्डयन मन्त्रालयका अनुसार भैरहवा र पोखरा विमानस्थल सञ्चालनमा ल्याउन हवाई टिकट, ग्राउण्ड ह्यान्डलिङ, हवाई इन्धनमा आगामी २०८३ साल भदौसम्म सहुलियत दिने कार्ययोजना बनाइएको छ । पर्यटन बोर्डले प्रतिटिकट लिने शुल्क पनि उक्त समयभर दुई विमानस्थलको हकमा नलिने गरी सहुलियत दिने र हवाई टिकटमा लगाइएको भ्याट पनि २०८३ भदौसम्म नलिने जनाइएको छ ।
उद्योग वाणिज्य मन्त्रालयसँगको समन्वयमा काठमाडौँको विमानस्थलमा उपलब्ध हुने इन्धनको मूल्यभन्दा भैरहवामा सस्तोमा लिनेगरी कार्ययोजना बनाइएको छ ।
