भोटेकोशी बाढीको कारण क्षतिग्रस्त जलविद्युत आयोजनाहरुबाट ९३४ जना सम्पर्क बिहिन अवस्थामा रहेका छन् । स्वतन्त्र ऊर्जा उत्पादकहरूको संस्था, नेपाल (इप्पान)ले सार्वजनिक गरेको पछिल्लो तथ्यांक अनुसार विभिन्न आयोजनामा कार्यरत ९३४ जना व्यक्तिहरु अझै हराइरहेका छन् ।
रसुवातर्फ २१६ मेगावाट क्षमताको निर्माणाधिन माथिल्लो त्रिशुली १ आयोजनाका ५७६ जना, सञ्चालनमा रहेको १११ मेगावाट क्षमताको रसुवागढी जलविद्युत आयोजनाका ९३ जना र निर्माणाधिन १२० मेगावाट क्षमताको रसुवा–भोटेकोशी आयोजनाबाट ४ जना मानिसहरु हराइरहेको इप्पानले जनाएको छ ।
यस्तै, सञ्चालनमा रहेको २० मेगावाट क्षमताको लाङटाङ खोला आयोजनाका ४२ जना, सञ्चालनमा रहेको २२ मेगावाट क्षमताको चिमिले आयोजनाबाट ८ जना, सञ्चालनमै रहेको ५ मेगावाट क्षमताको मेलुङ खोलाबाट ७ जना सम्पर्क बिहिन अवस्थामा रहेको इप्पानको भनाइ छ ।
यसैगरी, नुवाकोटतर्फ निर्माणाधिन ३७ मेगावाट क्षमताको माथिल्लो त्रिशुली ३ बी आयोजनाबाट १५८ जना, सञ्चालनमा रहेको ६० मेगावाट क्षमताको माथिल्लो त्रिशुली ३ ए आयोजनाबाट ४२ जना, सञ्चालनमा रहेको २४ मेगावाट क्षमताको त्रिशुली जलविद्युत आयोजनाबाट १ जना र १४.१ मेगावाट क्षमताको देविघाट जलविद्युत आयोजनाबाट १ जना हराइरहेका छन् ।
१५.६ मेगावाट क्षमताको निर्माणाधिन मिडल त्रिशुली गंगा आयोजनाबाट २ जना व्यक्तिहरु पनि हराइरहेको इप्पानले जानकारी गराएको छ ।
इप्पानका अनुसार हालसम्म २१६ मेगावाट क्षमताको अपर त्रिशुली १ का २५४ जनाको मात्रै उद्वार हुन सकेको र लाङटाङ, अपर त्रिशुली– १, त्रिशुली ३ ए र चिलिमे जलविद्युत आयोजनाहरुमा फसेका व्यक्तिहरुको तत्काल उद्वार आवश्यक रहेको छ । यसका लागि हेलिकप्टरको प्रबन्ध गर्ने प्रयास भइरहेको इप्पानले जनाएको छ ।
