कुवेतबाट नेपाल आएका यात्रुको लगेज कुवेत एयरलाइन्सले कुवेतमै छुटाइदिएको छ । त्रिभुवन अन्तर्राष्ट्रिय विमानस्थलमा आज बिहान ओर्लिएको कुवेत एयरलाइन्सको विमानले लगेज छुटाइदिएपछि यात्रुहरु मर्कामा परेका हुन् ।
कुवेत एयलाइन्सको उडान नम्बर केयू ३९१ विमान आज बिहान ६ः३० बजेको समयमा त्रिभुवन अन्तर्राष्ट्रिय विमानस्थलमा ओर्लिएको थियो । तर, जहाजले लगेज कुवेतमै छुटाइदिएपछि यात्रुहरुले आफ्ना लगेज पाएनन् । दशैँ मनाउन स्वदेश फर्किएका यात्रुहरुको लगेज एयरलाइन्स कम्पनीले उतै छुटाइदिएपछि यात्रुहरु मर्कामा परेका छन् । करिब ८० प्रतिशत यात्रुको लगेज छुटेको बताइएको छ ।
यात्रुहरुले काठमाडौँस्थित त्रिभुवन अन्तर्राष्ट्रिय विमानस्थलमा रहेको कुवेत एयरलाइन्सको सम्पर्क कार्यालयमा लगेज दाबी गर्दै पी.आई.आर. (प्रोपर्टी इरेगुलारिटी रिपोर्ट) दिएका छन् ।
कुवेत एयरलाइन्सका कर्मचारीहरुले आगामी सोमबारसम्म सुरक्षित रुपमा लगेज उपलब्ध गराउने बताएका छन् । तर, दशैँ मनाउन आएका यात्रुहरुले भने लगेज छुट्टा महत्वपूर्ण सामान पनि उतै छुटेकाले दशैँ खल्लो हुने बताइरहेका छन् ।
