तीन दिनको निरन्तर वर्षापछि स्थलमार्ग ठप्प प्रायः हुँदा यात्रुहरु हवाई यात्रातर्फ मोडिएका छन् । खासगरि काठमाडौँ प्रवेश हुने मुख्य राजमार्गहरु नै अवरुद्द हुँदा यात्रुहरुले सास्ती ब्यहोर्नु परिरहेको छ ।
गाडी नचल्दा यतिबेला एयरलाइन्स कम्पनीका टिकट काउण्टर र विमानस्थलमा यात्रुको चाप परेको एयरलाइन्स कम्पनीहरुले जनाएका छन् । अनलाइनमार्फत टिकट नपाएकाहरु पनि विमानस्थलस्थित विभिन्न एयरलाइन्सको काउण्टरमा पुग्दा टिकट पाइने आशामा एयरपोर्ट पुग्ने गरेका छन् । जसका कारण विमानस्थलमा चाप परेको छ ।
सबै सिट बुकिङ हुँदा एयरलाइन्स कम्पनीहरुलाई पनि उडानको व्यवस्थापन मिलाउन हम्मे हम्मे परेको छ । यात्रुको अत्याधिक चापका कारण काठमाडौँस्थित त्रिभुवन अन्तराष्ट्रिय विमानस्थलबाट हुने आन्तरिक उडानका तालिका प्रभावित भएका छन् । तोकिएको सेड्युल भन्दा २ घण्टा ढिलो गरी जहाजहरुले उडान भर्नुपर्ने बाध्यता रहेको विमानस्थलका अधिकारीहरुले बताएका छन् ।
यसैगरी, आइतबारबो सेड्युल उडान प्रभावित हुँदा पनि त्यसको चाप सोमबार परेको एयरलाइन्स कम्पनीहरुले जनाएका छन् । यति एयरका प्रवक्ता सुदर्शन बर्तौलाका अनुसार आइतबारको उडान आज गर्नुपर्दा र आज पनि थप सेड्युअल उडानको चाप बढ्दा उडानको व्यवस्थापन मिलाउन गाह्रो भएको हो ।
एयरलाइन्स कम्पनीका प्रतिनिधिहरु र विमानस्थलका अधिकारीहरुका अनुसार यात्रुको चाप अझै केही दिन लम्बिने देखिन्छ । हाल भइरहेका बुकिङले पनि करिब करिब दशैँसम्म नै यस्तै खालको चाप देखिने संकेत गरेको उनीहरुको भनाइ छ ।
‘यो चाप अझै केही दिन लम्बिने देखियो, यो हप्ता बाढी पहिरोको चाप कायम रहेपछि त्यसपछि त दशैँका लागि बुकिङ गरेकाहरुको उडान सुरु भइहाल्छ’ एक एयरलाइन्स कम्पनीका प्रतिनिधिले भने, ‘असोजको २० पछिका सबै उडान प्रायः दशैँका उडान हुन्छन् ।’
दशैँको मुखमा राजमार्ग प्रभावित हुँदा यसको सकस एयरलाइन्स कम्पनीहरुलाई परेको र तत्काल सबै राजमार्ग सवारीसाधन चल्न सक्ने गरी मर्मत सम्भार गर्न सकिने सम्भावना कम रहेकाले दशैँसम्मै एयरलाइन्स कम्पनीमा चाप कायम रहने अनुमान गरिएको छ ।
