तारा एयरले काठमाडौँ–मन्थली सिँधा चार्टड उडान गर्न लागेको छ । कम्पनीका प्रवक्ता सुदर्शन बर्तौलाका अनुसार लुक्लाबाट आएर मन्थलीमा रोकिएका पर्यटकलाई काठमाडौँ ल्याउन काठमाडौँबाट सिँधा रामेछापको मन्थलीमा उडान गर्न लागिएको हो ।
लुक्लाबाट मन्थलीसम्म हवाई उडानमार्फत पर्यटक फिर्ता ल्याएर त्यहाँबाट स्थलमार्ग हुँदै काठमाडौँ ल्याउने गरिएको थियो । तर, अविरल वर्षाका कारण रामेछाप–काठमाडौँको सडक सम्पर्क सबैतिर टुटेपछि ट्राभल एजेन्सीले तारा एयरको जहाज चार्टड गरेर पर्यटकलाई काठमाडौँ ल्याउन लागेको हो ।
ताराका प्रवक्ता बर्तौलाका अनुसार आज ४ वटा चार्टड उडानमार्फत मन्थलीमा फसेका पर्यटक र सहयोगीलाई काठमाडौँ ल्याइनेछ । यसका लागि ताराका २ वटा जहाजले २/२ पटक काठमाडौँ–रामेछाप उडान गर्ने उनको भनाइ छ ।
‘एक पटकमा १८ जनाजति ल्याउन सकिन्छ, आजै ४ फ्लाइट गर्ने गरि ट्राभल एजेन्सीले चार्टड गरेको हो’ उनले भने, ‘मौसमले साथ दिएको अवस्थामा आजै ४ फ्लाइट हुन्छ ।’
