नेपाली कांग्रेसका नेताहरुले प्रधानमन्त्री केपी शर्मा ओलीलाई भेटेर नेपाल नागरिक उड्यन प्राधिकरण (क्यान)लाई सेवा प्रदायक र नियामक गरी दुइ निकायमा विभक्त गर्न आग्रह गरेका छन् । कांग्रेस सांसदहरुले क्यान एउटै निकायसँग सेवा प्रदान गर्ने र नियमन पनि गर्ने अख्तियारी हुँदा हवाई सुरक्षामा असर परेको भन्दै टुक्र्याउन प्रधानमन्त्रीको ध्यानाकर्षण गराएका हुन् ।
कांग्रेस नेताहरुले अन्तर्राष्ट्रिय नागरिक उड्डययन संगन (आईकाओ) र युरोपेली संघ (ईयू) दुबैले हालको नागरिक उड्डयन प्राधिकरणलाई सेवाप्रदायक र नियामक निकायमा विभक्त गर्न आग्रह गरेको वर्षौ भइसकेको समेत स्मरण गराएका छन् । सेवा प्रदायक र नियामक निकायमा विभक्त नगर्दा सन् २०१३ देखि हालसम्म ईयूले नेपालको उड्डययन क्षेत्रलाई कालोसूचीमा राखेको छ ।
कांंग्रेस सांसदहरुले प्रधानमन्त्री ओलीसँगको भेटमा प्राधिकरणको नेतृत्व हवाई सुरक्षामा संवेदनशील नभएको र महानिर्देशक प्रदीप अधिकारीको भूमिका सन्तोषजनक र जिम्मेवार नदेखिएको भन्दै उनलाई हटाउन समेत आग्रह गरेका छन् ।
प्रधानमन्त्रीसँगको भेटमा पार्टी सभापति शेरबहादुर देउवा, गृहमन्त्री रमेश लेखक, परराष्ट्रमन्त्री आरजु राणा, सांसदहरू उदय शमशेर राणा, राजन केसी, सञ्जय गौतम र राजेन्द्र बजगाई सहभागी थिए ।
कांग्रेस नेताहरुको कुरा सुनेपछि प्रधानमन्त्री ओलीले हवाई क्षेत्रमा सेवा प्रदायक र नियामक गरी दुई निकाय बनाउने र यस सम्बन्धि विधेयक तयार गर्न विभागीय मन्त्रीसँग छलफल गर्ने बताएका छन् ।
