नयाँ वर्ष २०८३ वैशाख १ गतेदेखि बुद्ध एयरले आफ्नो ‘रोयल क्लब फ्रिक्वेण्ट फ्लायर’ कार्यक्रमलाई पूर्ण रुपमा डिजिटल तथा अनलाईन प्रणालीमा रुपान्तरण गरेको छ । नियमित हवाई उडान गर्ने यात्रुहरुका लागि दशकौंदेखि सञ्चालन हुँदै आएको यस कार्यक्रममार्फत लाखौं सदस्य लाभान्वित हुँदै आएका छन् ।
यात्रु सदस्यहरुले यस फ्रिक्वेण्ट फ्लायर कार्यक्रममार्फत उडानसँगै ‘माईलेज प्वाईण्ट’ जम्मा गर्न पाउनेछन् । निश्चित माईलेज प्वाईण्ट संकलन भएपछि यात्रु तथा तिनका परिवारका सदस्यले डिस्काउण्ट एवं निःशुल्क हवाई टिकट प्राप्त गर्न सक्नेछन् ।
सस्तो टिकटमा पनि माईलेज प्वाईण्ट बुध्द एयरले यसअघि रिफण्डेबल टिकट अर्थात वाई, ए र बी क्लासमा मात्र यात्रुलाई माईलेज प्वाईण्ट प्रदान गर्दै आएकोमा अबदेखि नन–रिफण्डेबल टिकटमा पनि माईलेज प्वाईण्ट प्रदान गरिने बुध्द एयरका सेल्स एण्ड मार्केटिङ डाईरेक्टर रुपेश जोशीले जनाएका छन् ।
अनलाईनबाटै माईलेज टिकट
अब यात्रुहरुले संकलित माईलेज प्वाईण्ट प्रयोग गरि बुध्द एयरको मोबाईल एप वावेवसाईटबाटै सजिलै टिकट काट्न सक्नेछन् । यसअघि यो सुविधा केवल सेल्स काउण्टर वा एयरपोर्ट काउण्टरमार्फत मात्र उपलब्ध थियो ।
उदाहरणको लागि काठमाडौंबाट पोखरा उडानमा नन रिफण्डेबल टिकटबाट यात्रुले ११२ माईलेज प्वाईण्ट प्राप्त गर्छन् भने सोही बराबरको अर्को पोखरा–काठमाडौं उडान टिकटमा रु. ११२ सम्मको सहजै डिस्काउण्ट प्राप्त गर्न सक्छन् ।
यात्रुहरुले जुनसुकै प्लेटफर्म वा ट्राभल एजेन्सीबाट टिकट काट्दा आफनो रोयल क्लब नम्बर उल्लेख गर्न बुध्द एयरले अनुरोध गरेको छ । यसले यात्रापछि प्राप्त हुने माईलेज प्वाईण्ट तथा डिस्काउण्टको सुविधा लिन सजिलो हुने बुध्द एयरले विज्ञप्तिमा उल्लेख गरेको छ ।
अन्य थुप्रै छुटहरु
रोयल क्लबका सदस्यहरुले सुपर मार्केट, ग्रोसरी पसल, होटल, रिसोर्ट, गिफ्ट सपबाट पनि माईलेज प्वाईण्ट प्रयोग गरि डिस्काउण्ट प्राप्त गर्न सक्नेछन् । यसका लागि रोयल क्लबले विभिन्न साझेदार संस्थासँग सहकार्य विस्तार गरिरहेको र इच्छुकहरुलाई सहकार्यका लागि आह्वान गरिएको पनि विज्ञप्तिमा उल्लेख गरिएको छ ।
