नेपाल एयरलाइन्सले आफ्ना जहाज डाइभर्ट हुँदा गौतमबुद्ध अन्तर्राष्ट्रिय विमानस्थल प्रयोग गर्ने भएको छ । हाल निगमका जहाज त्रिभुवन अन्तर्राष्ट्रिय विमानस्थलमा विभिन्न कारणले अवतरण हुन नसक्दा भारतको विमानस्थललाई आधार गरी डाइभर्ट भइरहेकोमा अबदेखि गौतमबुद्ध अन्तर्राष्ट्रिय विमानस्थलमा डाइभर्ट गरिने भएको हो ।
निगमले मंसिर १ गते नै मंसिर ३ गतेदेखि लागू हुने गरी यस्तो निर्णय गरेको प्रवक्ता अनिल घिमिरेले जानकारी दिएका छन् । उनका अनुसार त्रिभुवन अन्तर्राष्ट्रिय विमानस्थलमा अवतरण गर्दा जहाज डाइभर्ट गर्नुपरे गौतमबुद्ध अन्तर्राष्ट्रिय विमानस्थल भैरहवालाई अल्टरनेटिभ विमानस्थलका रुपमा प्रयोग गर्ने निर्णय भएको हो ।
निगमले गौतमबुद्ध अन्तर्राष्ट्रिय विमानस्थललाई अल्टरनेटिभ विमानस्थलका रुपमा प्रयोग गर्दा उल्लेखनीय खर्च कटौती भई समयको समेत वचत हुने विश्वास लिएको छ ।
साथै पोखरा अन्तर्राष्ट्रिय विमानस्थललाई समेत अल्टरनेटिभ विमानस्थल बनाई प्रयोग गर्नका लागि आवश्यक अध्ययनको प्रक्रिया थालनी गर्ने निर्णय समेत भएको निगमले जनाएको छ ।
