सोलुखुम्बुको माप्य दूधकोशीका उजिर कार्की शनिबार अचानक काठमाडौँ आउनुपर्ने थियो । जरूरी काम परेपछि उनले जहाजमार्फत काठमाडौँ जानका लागि फाप्लुस्थित नेपाल एयरलाइन्सको कार्यालयमा फोन गरे । तर, एयरलाइन्सको कार्यालयबाट पहिले झै “टिकट छैन” भन्ने जवाफ आयो ।
कार्की मात्रै होइनन्, सोलुखुम्बुका सर्वसाधारणले जहाजको टिकटका लागि फोन गर्दा हरेक पटक पाउने जवाफ नै यहीँ हो । उनलाई जस्तै, धेरैलाई अत्यावश्यक काम परे पनि ‘सामान्य’ फोन, सामान्य शैली, सामान्य नागरिकको हैसियतमा जहाजको टिकट पाइन्छ भन्ने विश्वास लगभग गुमिसकेको छ । अन्ततः उनी सडकमार्ग भएर काठमाडौँ आउन बाध्य भए ।
“यो घटना व्यक्तिगत पीडा मात्र होइन, सोलुखुम्बुमा विमान सेवा कति अव्यवस्थित, कति पहुँचवाला व्यक्तिको कब्जामा र कति सर्वसाधारणविरोधी बनिरहेको छ भन्ने कठोर यथार्थ हो” सल्लेरीका रश्विन मगरले भने ।
त्यसो त, अहिले नेपाल वायुसेवा निगमले फाप्लु–काठमाडौँ रुटमा हप्तामा चार उडान गर्दै आएको छ । सोमबार, बुधबार, शुक्रबार र शनिबार हुने उडानमा सर्वसाधारणले सहजै टिकट पाउँदैनन् । निजी क्षेत्रका वायुसेवा कम्पनीहरूले अनुकुलता नदेखेर फाप्लु–काठमाडौँ उडान तालिका नै हटाएपछि सोलुखुम्बुवासी नेपाल एयरलाइन्सकै भर पर्नुपर्ने बाध्यतामा छन् । तर टिकट नपाउँदा उनीहरुका लागि उडान सेवा ‘आकाशको फल’ सरह बनिरहेको छ ।
यस रुटमा एक हिसाबले भन्ने हो भने नेपाल एयरलाइन्सको एकाधिकार नै छ । तर, सर्वसाधारणको पहुँच झन्–झन् सिमित हुँदै गएको छ। सर्वसाधारणले फोन गर्दा सधैँ ‘टिकट सकिसक्यो, सिट खाली छैन, अघिल्लो हप्तादेखि नै बुकिङ छ’ लगायतका जवाफ मात्रै सुन्ने गरेका छन् ।
तर, ‘माथिबाट सिफारिस आएपछि भने नेपाल एयरलाइन्सले तुरुन्तै टिकट दिने’ सर्वसाधारणहरुको दाबी छ । सल्लेरीका व्यवसायी महेश अधिकारी भन्छन्, “सामान्य मानिसले टिकट माग्यो भने ‘छैन’ भन्छन्, तर ठूला मान्छेले फोन गरेपछि तुरुन्तै टिकट निकालिदिन्छन् । फाप्लुमा अहिले पावर नलागाई एयरलाइन्सको टिकट पाउनु लगभग असम्भवजस्तै भएको छ ।”
सोलुकै सन्देश राईको अनुभव झन् कठोर छ । उनका अनुसार काठमाडौँबाट सोलु जाँदा समस्या छैन । तर सोलुबाट काठमाडौँ आउनु/जानु पर्दा भने टिकट पाउनु भनेको फलामको चिउरा चपाएसरह रहेको उनको भनाई छ ।
यता, नेपाल एयरलाइन्स फाप्लुका स्टेशन इन्चार्ज तेन्जी शेर्पा भने विदेशी पर्यटकहरू काठमाडौँ फर्कने भएकाले उनीहरूलाई प्राथमिकतामा राख्नुपर्दा सामान्य यात्रुलाई सिट दिन समस्या रहेका स्वीकार गर्छन् ।
सोलुखुम्बुबाट सजिै हवाई टिकट नपाएको गुनासो काठमाडौँको ट्राभल्स एजेन्सीमा समेत आउने गरेको छ । एक एजेन्सीका सञ्चालकका अनुसार टिकट नपाउने पटक पटक गुनासो आएपछि एयरलाइन्सको हेड अफिसमा पनि समस्या राखिएको छ ।
