गतिशील लोकतान्त्रिक पार्टीमार्फत राजनीतिमा प्रवेश गरेका बुद्ध एयरका कार्यकारी अध्यक्ष वीरेन्द्रबहादुर बस्नेतले नेपाल वायुसेवा निगम (नेपाल एयरलाइन्स)मा सरकारको स्वामित्व ३० प्रतिशतमा झारेर व्यवस्थापन सुधार गर्नुपर्ने बताएका छन् । आफ्नो पार्टीको पर्यटन नीति सार्वजनिक गर्ने क्रममा उनले नेपाल एयरलाइन्सलाई पब्लिक कम्पनी बनाउनुपर्ने आवश्यकता औल्याएका हुन् ।
बस्नेतले नेपाल एयरलाइन्सलाई पब्लिक कम्पनीमा रुपान्तरण गरेर ३० प्रतिशत मात्रै सरकारको स्वामित्व राखेर बाँकी सर्वसाधारणको सेयर रहने गरी व्यवस्थापन सुधार गर्नुपर्ने बताएका हुन् । पब्लिक कम्पनी बनाएसकेपछि त्यसको प्रमुख कार्यकारी अधिकृत (सीईओ) छनोट गर्दा अन्तर्राष्ट्रिय आवेदन खुलाउनुपर्ने पनि बताएका छन् । जसका कारण नेपाल एयरलाइन्स संसारकै उत्कृष्ट वायुसेवा कम्पनी बन्ने उनको विश्वास छ ।
उनले नेपाल एयरलाइन्समा जहाजको संख्या कम्तीमा ५० वटा पुर्याउनुपर्ने पनि बताए । ‘इथियोपियाले १ सय जहाज उडाउन सक्छ, नेपाल एयरलाइन्सले किन सक्दैन ?’ बस्नेतले प्रश्न गरे ।
