चाडवाडको समयमा हप्तामा ३ उडान हुँदै आएको रामेछाप–काठमाडौँ–रामेछाप रुटमा अब हप्तामा एक उडान मात्रै हुने भएको छ । नागरिक उड्डयन कार्यालय रामेछापका अनुसार अब हरेक शुक्रबार रामेछाप–काठमाडौँ–रामेछाप रुटमा हवाई हुने छ ।
शान्तिदीप युवा क्लब मन्थलीका अध्यक्ष सुरेश उदासको संयोजकत्वमा बिहीबार नागरिक उड्डयन कार्यालयका प्रतिनिधि र रामेछाप विमानस्थलबाट उडान गर्दै आएका हवाई सेवा प्रदायक कम्पनीका प्रतिनिधिहरूबीच भएको छलफलले रामेछाप–काठमाडौँ–रामेछाप रुटमा सातामा एक उडान गर्ने निर्णय गरेको हो ।
निर्णय अनुसार कार्तिक १४ गतेदेखि उडान आरम्भ हुनेछ । शान्तिदीप युवा क्लब मन्थलीका अध्यक्ष उदासका अनुसार सीता एयर, तारा एयर र समिट एयरले पालैपालो हरेक शुक्रबार यस रुटमा उडान गर्नेछन् ।
रामेछाप विमानस्थलबाट यसअघि हप्ताको तीन दिनसम्म उडान हुँदै आएको भएपनि चाडपर्व सकिएको र सडक यात्रा सहज बन्दै गएपछि यात्रुको चाप घटेका
कारण हप्तामा एक दिन मात्रै उडान सञ्चालन गर्ने सहमति भएको हो ।
निर्णय अनुसार कार्तिक १४ गते सीता एयर, कार्तिक २१ गते तारा एयर र कार्तिक २८ गते समिट एयरले रामेछाप–काठमाडौँ रुटमा उडान गर्नेछन् । यो तालिका प्रत्येक महिनाको पहिलो हप्तादेखि क्रमशः लागू हुनेछ ।
