सिम्रिक एयरले सिन्धुपाल्चोक ईन्द्रावती गाउँपालिका वडा नं. ७ मा अवस्थित सानो संसार विद्यालयलाई सहयोग गरेको छ । एयरलाइन्सले आफ्नो सामाजिक उत्तरदायित्व कार्यक्रम अन्तर्गत उक्त विद्यालयलाई संचालन खर्च, विद्यार्थीलाई पोशाक र अभिभावकहरुलाई कफीका बिरुवाहरु प्रदान गरेको छ ।
सिन्धु उत्थान केन्द्रले गैरनाफामुलक उदेश्यका साथ सञ्चालन गरिरहेको सानो संसार विद्यालयमा एक कार्यक्रम आयोजना गरेर सिम्रिक एयरका प्रवन्ध निर्देशक क्याप्टेन सिद्धार्थ जंग गुरुङ्गले सहयोग हस्तान्तरण गरेका हुन् । उक्त कार्यक्रममा सिम्रिक एयरका प्रतिनिधि, सिन्धु उत्थान केन्द्रका प्रतिनिधि, विद्यालयका शिक्षक विद्यार्थी लगायत स्थानीयको सहभागिता रहेको थियो ।
काठमाडौंबाट नजिक रहेता पनि भौगोलिक जटिलता भएको उक्त गाउँमा वालबालिकाहरुमा उच्च शिक्षा हासिल गर्ने मनोवल रहोस् भनी सो सहयोग हस्तान्तरण गरिएको सिम्रिक एयरले जनाएको छ । यस्तै, समुदाय स्तरमा खेती प्रवद्र्धन गर्न र नगदेवाली प्रवद्र्धन गरि जीबिकोपार्जनमा टेवा पुर्याउने उदेश्यले कफीका विरुवा सहयोग गरिएको कम्पनीले जनाएको छ ।
सिम्रिक एयरले समाजिक स्तरमा प्रत्येक बर्ष यस्ता कार्यक्रम गर्दै आईरहेको र यस प्रकारका कार्यक्रम Earth C Air Nepal संगको सहयोगमा समेत गर्ने गरेको छ ।
सिम्रिक एयरको सहयोगमा Earth C Air Nepal ले गोर्खाको खोर्लाबेसीमा अस्पताल निर्माण गरि सञ्चालनरत छ । उक्त सहयोग आदान प्रदान सिम्रिक एयरका सल्लाहाकार एवं Earth C Air का संस्थापक स्व. Capt. Daniel Burner को स्मृतीमा गरिएको समेत सिम्रिक एयरले जनाएको छ ।
