राष्ट्रिय ध्वजावाहक नेपाल वायुसेवा निगम (नेपाल एयरलाइन्स) ६७ वर्षमा प्रवेश गरेको छ । सन् १९५८ जुलाई १ मा स्थापना भएको निगमले २८ सिट क्षमतायुक्त डोग्लस डिसी ३ डाकोटाबाट सेवा प्रारम्भ गरेको थियो । यस अवधिमा नेपाल एयरलाइन्सले वाइडबडी ए ३३०–२०० सिरिजको विमान भित्र्याएर समेत सेवा दिइरहेको छ ।
निगमले हाल अन्तर्राष्ट्रियतर्फ भारतको नयाँदिल्ली, बेङ्लोर र मुम्बई तथा हङ्कङ, मलेसिया, थाइल्याण्ड, जापानको नारिता, कतारको दोहा, युनाइटेड अरब इमिरेट्स (यूएई) को दुबई र साउदी अरबको रियादमा उडान भर्दै आएको छ ।
निगमले दुई थान वाइडबडी ए ३३० र दुई थान न्यारोबडी ए ३२० सिरिजका विमानमार्फत अन्तर्राष्ट्रिय गन्तव्यमा उडान गरिरहेको छ ।
आन्तरिकतर्फ दुई थान ट्वीनअटर विमानमार्फत दुर्गम गन्तव्यमा सेवा दिइरहेको छ । विमान अभावले निगमको आन्तरिक बजार खस्कँदो छ ।
स्थापनाको ६७ वर्षसम्म आइपुग्दा निगमको ऋण दायित्व करिब ५० अर्ब पुगेको छ ।
वाइडबडी विमान खरिद गर्ने बेला कर्मचारी सञ्चयकोष र नागरिक लगानी कोषबाट लिइएको ऋण र भएका विमानबाट सेवा प्रवाह चुस्त नहुँदा निगम ऋणले थलिएको हो । तर, ग्राउण्ड ह्याण्डलिङ सेवा र अन्तर्राष्ट्रिय गन्तव्यमा भएको व्यापार प्रवर्द्धनले केही राहत प्रदान गरेको छ ।
निगमका प्रवक्ता सुवास डाँगीका अनुसार हाल चारवटै वाइडबडी विमानमार्फत अन्तर्राष्ट्रिय गन्तव्यमा पूर्ण रुपमा उडान भइरहेका छन् । अन्तर्राष्ट्रियतर्फ थप नयाँ गन्तव्यमा उडान विस्तारका लागि पहल भइरहेको पनि निगमले जनाएको छ ।
