नेपाल नागरिक उड्डयन प्राधिकरण (क्यान)ले ५ हेलिकप्टर कम्पनीका १० जना पाइलटलाई ग्राउण्डेड गरेको छ । प्राधिकरण स्रोतका अनुसार एकसाथ १० जना पाइलटलाई ग्राउण्डेड गरिएको हो।
हेलिकप्टर उडानको क्रममा फोटो तथा भिडियो खिच्दा जोखिम बढ्ने भन्दै प्राधिकरणले त्यस्तो काम नगर्न पटकपटक निर्देशन दिएको पनि निर्देशन नमान्ने पाइलटलाई ग्राउण्डेड गरिएको क्यान स्रोतले जनाएको छ ।
स्रोतका अनुसार ग्राउण्डेड हुने पाइलटहरुमा हेलि एभरेष्टका ४, एयर डाइनेष्टीका ३, प्रभु हेलिकोप्टरका १, मनाङ एयरका १ र अल्टिच्यूड एयरका १ जना रहेका छन् ।
क्यान स्रोतले बताए अनुसार उडान सुरक्षामा गम्भिर असर पर्ने गरी पाइलटहरुले फोटो र भिडियो बनाउने गरेपछि बाध्य भएर कारबाही गर्नु परेको हो । उनीहरुलाई अर्को निर्णय नभएसम्मका लागि ग्राउण्डेड गरिएको हो ।
