बुद्ध एयरको ७२ सिट क्षमताको जहाजले काठमाडौं–भरतपुर परीक्षण उडान गरेको छ । बुद्ध एयरको ७२ सिटे जहाज बिहिबार बिहान भरतपुर विमानस्थलमा अवतरण गरेको हो ।
बुद्धका पाइलटद्वय प्रमोद थापा र रवि श्रेष्ठले विमानको परीक्षण उडान गरेका थिए ।
नेपाल नागरिक उड्डयन प्राधिकरणका उपमहानिर्देशक देवचन्द्रलाल कर्णले विमानको उडान अवतरणको निरीक्षण गरेका थिए । अब प्राधिकरणमा बुद्धले परीक्षण उडानको रिपोर्ट बुझाउने छ । एक वा डेढ महिनाभित्र रिपोर्ट बुझाइने र एयरलाइन्सले चाहेमा दुई महिनाभित्र नियमित उडान गर्न सक्ने उपमहानिर्देशक कर्णको भनाइ छ ।
परीक्षण उडानका क्रममा नेपाल नागरिक उड्यन प्राधिकरणका इन्जिनियरहरु पनि सँगै रहेकाले उनीहरुले पनि रिपोर्ट बुझाउने छन् ।
हाल बुद्ध एयरको ४२ सिट क्षमताको जहाजले मात्रै काठमाडौं–भरतपुर र पोखरा–भरतपुर उडान गर्दै आएको छ । अब ७२ सिट क्षमताको जहाज पनि चलाउने तयारीमा कम्पनी छ ।
बुद्धले हाल भरतपुरबाट दैनिक ७ उडान गर्दै आएको छ ।
यसअघि श्री एयरलाइन्सको ७२ सिट क्षमताको जहाजले २०८१ असार ६ गते भरतपुर विमानस्थलमा परीक्षण उडान गरेर कार्तिकदेखि नियमित उडान गर्दै आएको छ ।
