बिहीबार बिहानैदेखि सुरु भएको वर्षाका कारण रामेछापको मन्थली विमानस्थलबाट सोलुखुम्बुको लुक्ला विमानस्थलमा हुँदै आएको उडान अवरुद्ध भएको छ । उडान अवरुद्ध हुँदा सगरमाथा क्षेत्र घुम्न आएका पर्यटक रामेछाप सदरमुकाम मन्थलीमै रोकिएका छन् ।
वर्षाले लुक्लाको मौसम खराब हुँदा मन्थली–लुक्ला उडान हुन नसकेको मन्थली विमानस्थलका प्रमुख हिरण्य शाहले बताए । उनका अनुसार उडान अवरुद्द हुँदा मन्थलीबाट लुक्ला जाने र लुक्लाबाट मन्थली फर्कने पर्यटकलाई समस्या भएको छ ।
बिहीबार मन्थलीबाट लुक्ला जाने ५० जना भन्दा बढी पर्यटक मन्थलीमा रोकिएका छन् ।
अहिले वसन्त ऋतुकालिन सिजनको सगरमाथा क्षेत्र भ्रमण गरी फर्कने समय भइसकेकाले लुक्ला जाने भन्दा फर्कने पर्यटक धेरै हुन्छन् । चैतदेखि सुरू भएको यो सिजनको सगरमाथा आरोहण जेठ महिनासम्म चल्छ ।
सरकारले सगरमाथा क्षेत्र भ्रमणमा आएका पर्यटकलाई दुई सिजनमा मन्थली विमानस्थलको प्रयोग गरी गन्तव्यसम्म पुर्याउने गरेको छ । चैतदेखि जेठ महिनासम्म र असोज पहिलो सातादेखि मङ्सिरको १५ गतेसम्म मन्थली विमानस्थलबाट लुक्ला पर्यटक लैजाने र ल्याउने व्यवस्था गरिएको छ ।
बिहानैदेखि मौसम खुलेको समयमा एकैदिन ८५० जनासम्म पर्यटक मन्थलीबाट लुक्ला पुग्ने गरेका छन् ।
