संसदीय उपसमितिले पोखरा अन्तर्राष्ट्रिय विमानस्थल निर्माणका क्रममा भएको भनिएको अनियमितताका सम्बन्धमा स्थलगत अध्ययन सहितको प्रतिवेदन बुझाएको छ । लेखा समितिले गठन गरेको संसदीय उपसमितिका संयोजक एवम् राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले विमानस्थलको अध्ययन प्रतिवेदन लेखा समितिमा बुझाएका हुन् ।
लिङदेनले लेखा समितिका सभापति ऋषिकेश पोखरेललाई प्रतिवेदन हस्तान्तरण गरेका हुन् । गत असार १४ गते प्रतिनिधिसभा अन्तर्गतको सार्वजनिक लेखा समितिले पोखरा अन्तर्राष्ट्रिय विमानस्थलको अध्ययन–अनुगमन र छानबिन गरी रायसहितको प्रतिवेदन बुझाउन उपसमिति गठन गरेको थियो ।
उक्त उपसमितिको संयोजक लिङदेन थिए भने अर्जुननरसिंह केसी, गोकुलप्रसाद बाँस्कोटा, जनार्दन शर्मा, प्रेमबहादुर आले, तारा लामा, तेजुलाल चौधरी, दीपक गिरी, देवप्रसाद तिमिल्सिना, रामकृष्ण यादव र रुक्मणि राना सदस्य थिए ।
२४ अर्ब लगानीमा निर्माण भएको पोखरा विमानस्थल २०७९ पुसमा निर्माण सम्पन्न भएर उद्घाटन भएपनि हालसम्म व्यवसायिक रुपमा नियमित उडान हुन सकेको छैन । संसदीय उपसमितिले ठूलो रकम अनियमितता भएको निष्कर्ष निकाल्दै नागरिक उड्डयन प्राधिकरणका बहालवाला महानिर्देशक समेतलाई तत्काल निलम्बन गरेर कारबाही गर्न सिफारिस गरेको छ ।
