भारतीय वायुसेवा कम्पनी स्पाइस जेटले ५ वर्षपछि नेपालमा उडान गर्ने भएको छ । भारतको निजी अन्तर्राष्ट्रिय हवाई सेवा प्रदायक कम्पनी स्पाइस जेटले वैशाख २७ गते (मे १०) देखि नेपालमा दैनिक एक उडान गर्न लागेको हो ।
स्पाइस जेटले नेपालका लागि जनरल सेल्स एजेन्ट (जीएसए)मा हिमालयन ग्लोबल ट्राभल सर्भिसेस प्रा.लि.लाई नियुक्त गरिसकेको छ । जस अनुसार उसले उडान तालिका समेत सार्वजनिक गरेको छ ।
स्पाइस जेटले दिल्लीबाट काठमाडौँका लागि १ सय ८९ सिट क्षमताको बोइङ ७३७ जहाजमार्फत उडान गर्नेछ । स्पाइस जेटले हरेक दिन बिहान ९ः५५ बजे त्रिभुवन अन्तर्राष्ट्रिय विमानस्थल अवतरण गर्ने र यहाँबाट १०ः५५ बजे दिल्ली फर्किने तालिका बनाएको छ ।
कम्पनीले काठमाडौँ–दिल्ली उडान गर्न प्रतियात्रु भाडा दर १७ हजार रुपैयाँ तोकेको छ । निकट भविष्यमा दैनिक २ उडान गर्ने कम्पनीको लक्ष्य छ ।
यसअघि पनि लामो समय नेपाल उडान गरेको स्पाइस जेटले कारोनापछि नेपलमा उडान बन्द गरेको थियो । ९७ जहाजबाट संसारका ९३ गन्तव्यमा उडान गरिरहेको स्पाइस जेट ५ वर्षपछि नेपाल फर्किन लागेको हो ।
